وزیراعظم محمد شہباز شریف نے کہا ہے کہ 9 مئی کے المناک واقعات میں اپنے جرم سے لوگوں کی توجہ ہٹانے کے لیے عمران خان کسی بھی حد تک جا سکتے ہیں۔
شہباز شریف نے جمعرات کو اپنے ٹوئٹ میں کہا کہ ہمارے قانون نافذ کرنے والے اداروں اور پولیس کو بدنام کرنے کے لیے عمران خان کی نئی چال کے پیچھے چھپے برے ارادے کو سمجھنے کے سلسلے میں کوئی غلطی نہ کی جائے۔
انہوں نے کہا کہ پی ٹی آئی سربراہ ایک بار پھر 9 مئی کے المناک واقعات میں اپنے جرم سے توجہ ہٹانے کے لیے ’انسانی حقوق کی خلاف ورزی‘ کے گمراہ کن اور بے بنیاد الزامات لگا رہے ہیں۔
عمران نیازی کی قانون نافذ کرنے والے اداروں اور پولیس کے بارے تضحیک آمیز مہم کے بارے میں کوئی مغالطہ نہیں ہونا چاہئیے. ایک مرتبہ پھر وہ انسانی حقوق کی پامالی کا جھوٹا پراپیگینڈہ پھیلا کر 9 مئی کے واقعات میں اپنے مجرمانہ کردار سے توجہ ہٹانے کی کوشش کر رہے ہیں. مجھے انکے ہتھکنڈوں پر…
— Shehbaz Sharif (@CMShehbaz) June 1, 2023
وزیراعظم نے کہا کہ ’مجھے اس کی حرکات پر کوئی تعجب نہیں ہے کیوں کہ جو شخص مسلسل ریاستی اداروں کے خلاف نازیبا زبان استعمال کرے، لوگوں کو تشدد پر اکسائے، ریاستی علامات اور فوجی تنصیبات پر حملہ کروائے اور شہداء کی یادگاروں کو گروائے وہ کسی بھی حد تک جا سکتا ہے‘۔
شہباز شریف نے کہا کہ عمران خان نے غلط معلومات پھیلانے والے ہرکاروں کے ذریعے لوگوں کو بے وقوف بنانے کے لیے جعلی خبروں ولا طریقہ کار اپنایا۔ ان کی پھیلائی ہوئی باتوں میں نفرت، تقسیم اور جھوٹ کے علاوہ کچھ نہیں۔
