اوگرا کے ترجمان نے ملک میں پیٹرولیم مصنوعات کی کمی کی افواہوں کو بلاجواز قرار دے دیا۔
نجی ٹی وی سے ٹیلیفونک گفتگو میں ترجمان اوگرا عمران غزنوی نے بتایا کہ ملک بھر میں فی الحال پیٹرول اور ڈیزل وافر مقدار میں دستیاب ہیں اور کسی قسم کی قلت نہیں ہے۔
ان کے بقول لوگ قیمتوں میں اضافے سے پہلے زیادہ سے زیادہ تیل خریدنا چاہتے تھے۔
ترجمان نے کہاکہ مارکیٹ میں پھیلائی گئی افواہیں اب ختم ہو چکی ہیں اور عوامی افراتفری بھی کنٹرول میں ہے۔ ملک بھر کے پیٹرول پمپس کی نگرانی سختی سے کی جا رہی ہے۔
انہوں نے مزید کہاکہ آئل کمپنیوں پر بھی گہری نظر رکھی گئی ہے اور کسی بھی پیٹرول پمپ کی جانب سے قلت، ذخیرہ اندوزی یا زائد قیمت میں ملوث ہونے کی صورت میں فوری اطلاع دی جائے۔
