پارلیمنٹ نے قومی احتساب بیورو (نیب) سے متعلق قانون میں ترمیم کرتے ہوئے کرپشن کیسز کی کم از کم رقم کو مہنگائی کے ساتھ جوڑ دیا ہے۔ اس تبدیلی کے بعد نیب کے لیے کارروائی کی حد ہر سال خودکار طور پر بڑھتی رہے گی۔
یہ بھی پڑھیں:صدر مملکت کی منظوری: نیب ترمیمی بل اور دیگر اہم بلز اب قانون کا حصہ بن گئے
پارلیمنٹ کی جانب سے قومی احتساب آرڈیننس 1999 میں ترمیم کر کے نیب کے لیے کرپشن کیس شروع کرنے کی کم از کم رقم کو مہنگائی سے منسلک کر دیا گیا ہے۔
اس ترمیم کے مطابق نیب کسی بھی ایسے کرپشن کیس پر کارروائی نہیں کر سکے گا جس میں رقم 50 کروڑ روپے سے کم ہو۔ اب یہ حد ہر مالی سال کے آغاز پر مہنگائی کے تناسب سے بڑھائی جائے گی۔
قانون میں یہ تبدیلی آرڈیننس کے سیکشن 5 میں ترمیم کے ذریعے کی گئی ہے۔ ترمیم کے مطابق یکم جولائی 2022 سے ہر مالی سال میں اس رقم کو پاکستان بیورو آف اسٹیٹسٹکس کی جانب سے جاری کیے جانے والے مہنگائی کے اشاریے کے مطابق ایڈجسٹ کیا جائے گا۔
اس کا مطلب یہ ہے کہ پہلے سے موجود 50 کروڑ روپے کی حد ہر سال مہنگائی کے حساب سے بڑھتی رہے گی، جس کے بعد نیب کے لیے کرپشن کیسز پر کارروائی کرنا مزید مشکل ہو سکتا ہے۔
یہ بھی پڑھیں:کوہستان میگا کرپشن اسکینڈل: نیب نے پلی بارگین کے تحت ساڑھے 4 ارب روپے ریکور کرلیے
میڈیا رپورٹ کے مطابق نیب نے حکومت اور پارلیمنٹ کو تجویز دی تھی کہ کم از کم رقم کو 50 کروڑ سے کم کر کے 30 کروڑ روپے کر دیا جائے تاکہ ادارہ زیادہ کرپشن کیسز کی تحقیقات کر سکے، تاہم اس تجویز کو قبول نہیں کیا گیا۔
