ہنگامی صورتحال میں شہری کیا کریں؟ سعودی محکمہ شہری دفاع کی اہم ہدایات

سعودی عرب کے محکمۂ شہری دفاع نے ہنگامی صورتحال کے پیش نظر شہریوں کو خبردار کرتے ہوئے کہا ہے کہ اگر قومی ابتدائی وارننگ پلیٹ فارم کی جانب سے انتباہی پیغام موصول ہو تو فوری طور پر حفاظتی ہدایات پر عمل کیا جائے۔

حکام کے مطابق شہری فوراً قریبی محفوظ مقام، جیسے کسی عمارت کے اندر یا ایسی بند جگہ میں پناہ لیں جو کھڑکیوں سے دور ہو، اور خطرہ ختم ہونے تک وہیں موجود رہیں۔

کھلے مقامات، شیشوں والی جگہوں، بالکونیوں اور چھتوں سے دور رہنے کی ہدایت بھی کی گئی ہے۔

باہر موجود افراد کے لیے رہنما اصول

بیان میں کہا گیا ہے کہ باہر موجود افراد قریبی عمارت میں داخل ہو جائیں یا کسی مضبوط رکاوٹ کے پیچھے پناہ لیں، جبکہ شہریوں کو متاثرہ مقامات پر ہجوم کرنے اور تصاویر بنانے سے بھی گریز کرنے کا مشورہ دیا گیا ہے۔

سفر کے دوران احتیاطی تدابیر

محکمۂ شہری دفاع نے مزید ہدایت کی ہے کہ گاڑی میں سفر کے دوران اگر انتباہی پیغام موصول ہو تو گاڑی کو سڑک کے کنارے کسی محفوظ مقام پر روک لیا جائے اور پلوں یا بلند عمارتوں سے دور رہا جائے۔

حکام نے کہا ہے کہ مکہ مکرمہ، مدینہ منورہ اور ریاض کے علاقوں میں ہنگامی مدد کے لیے 911 جبکہ دیگر علاقوں میں 998 پر رابطہ کیا جا سکتا ہے، اور شہری سرکاری ذرائع سے جاری ہدایات پر عمل کریں۔