ڈی جی خان کے سرحدی گاؤں جوتر کے قریب کاؤنٹر ٹیررازم ڈیپارٹمنٹ (سی ٹی ڈی) اور دہشت گردوں کے درمیان شدید فائرنگ کا تبادلہ ہوا۔
ترجمان سی ٹی ڈی کے مطابق فتنہ الخوارج سے تعلق رکھنے والے 4 خطرناک دہشتگرد فائرنگ کے تبادلے میں ہلاک ہو گئے، جبکہ 11 دہشتگرد اندھیرے کا فائدہ اٹھاتے ہوئے فرار ہو گئے۔
ترجمان کے مطابق سی ٹی ڈی نے دہشتگردوں کی گرفتاری کے لیے خفیہ اطلاع پر انٹیلی جنس بیسڈ کارروائی کی تھی۔ کارروائی کے دوران دہشتگردوں نے سی ٹی ڈی ٹیم پر فائرنگ کر دی، جس کے بعد اہلکاروں نے جوابی فائرنگ کی۔
فائرنگ کے تبادلے کے نتیجے میں 4دہشتگرد ہلاک ہو گئے جبکہ 11 فرار ہونے میں کامیاب ہو گئے۔
ترجمان سی ٹی ڈی کے مطابق دہشتگردوں کے قبضے سے رائفلیں، گولیاں، بارودی مواد اور دیگر سامان برآمد کیا گیا ہے۔
فرار ہونے والے دہشتگردوں کی گرفتاری کے لیے سرچ آپریشن جاری ہے، جبکہ سی ٹی ڈی ٹیموں نے جوتر کے علاقے کی ناکہ بندی بھی کر دی ہے۔ ترجمان کے مطابق ہلاک دہشتگردوں کی شناخت کا عمل جاری ہے۔
حملوں کی منصوبہ بندی کا انکشاف
سی ٹی ڈی کے مطابق دہشتگرد پولیس چوکیوں اور دیگر سرکاری اداروں کی تنصیبات پر حملے کی منصوبہ بندی مکمل کر چکے تھے۔
ترجمان نے کہا کہ کاؤنٹر ٹیررازم ڈیپارٹمنٹ پنجاب محفوظ پنجاب کے ہدف کے حصول کے لیے بھرپور اقدامات جاری رکھے ہوئے ہے اور دہشتگردی کی لعنت کو جڑ سے اکھاڑ پھینکنے کے لیے پرعزم ہے۔
