خیبرپختونخوا کابینہ نے بین الاقوامی صورتحال کے تناظر میں ایندھن کی بچت اور ذمہ دار طرزِ حکمرانی کے لیے اہم اقدامات کی منظوری دے دی۔
صوبائی حکومت نے سرکاری اخراجات میں کفایت شعاری اور ایندھن کے استعمال میں کمی لانے کے مقصد سے 2 ماہ کے لیے خصوصی اقدامات نافذ کرنے کا فیصلہ کیا ہے۔
معاونِ خصوصی برائے اطلاعات و تعلقاتِ عامہ شفیع جان کے مطابق کابینہ نے سرکاری دفاتر میں 50 فیصد گھر سے کام کی پالیسی متعارف کرانے کا بھی فیصلہ کیا ہے۔
یہ بھی پڑھیں: رمضان میں عوام کو ریلیف کے لیے وزیراعلیٰ خیبرپختونخوا کے سخت احکامات، ذخیرہ اندوزی روکنے کی ہدایت
وی آئی پی پروٹوکول گاڑیوں اور ہیلی کاپٹر کے غیر ضروری استعمال میں نمایاں کمی، سرکاری اخراجات میں کفایت شعاری، غیر ضروری تقریبات اور سرکاری عشائیوں پر پابندی بھی عائد کرنے کا فیصلہ کیا گیا ہے۔
وزیر اعلیٰ خیبرپختونخوا کی ہدایات پر کابینہ نے فیول کنزرویشن اور رسپانسبل گورننس انیشی ایٹو کی منظوری دی ہے۔
جس کے تحت سرکاری اداروں میں مختلف سطحوں پر ایندھن کے استعمال میں نمایاں کمی لائی جائے گی۔
انہوں نے بتایا کہ یہ اقدامات ابتدائی طور پر 2 ماہ کے لیے نافذ ہوں گے جبکہ صورتحال کے تجزیے کے بعد ان میں توسیع کا فیصلہ کیا جائے گا۔
شفیع جان کے مطابق صوبائی کابینہ نے سرکاری محکموں میں اجلاسوں کو سو فیصد آن لائن کرنے کا فیصلہ کیا ہے تاکہ غیر ضروری سفر اور ایندھن کے استعمال کو کم کیا جا سکے۔
اس کے علاوہ سرکاری گاڑیوں کے فیول الاؤنس میں مزید 25 فیصد کمی کی منظوری دی گئی ہے۔
مزید پڑھیں: خیبرپختونخوا میں کرکٹ کی رونقیں بحال، پی ایس ایل 2026 کے میچز پشاور میں بھی کرانے کا فیصلہ
انہوں نے بتایا کہ اس سے قبل کووڈ کے دوران نافذ کیے گئے اقدامات کے تحت بھی 25 فیصد کمی پہلے ہی موجود ہے، جس کے بعد مجموعی کٹوتی 50 فیصد ہو گئی ہے۔
انہوں نے کہا کہ پولیس، ریسکیو اور دیگر قانون نافذ کرنے والے اداروں کو فیول کٹوتی سے مستثنیٰ رکھا گیا ہے تاکہ ان کی آپریشنل سرگرمیاں متاثر نہ ہوں۔
انہوں نے بتایا کہ تعلیمی اداروں کو جمعہ کے روز بند رکھنے کی تجویز زیر غور ہے تاکہ ایندھن کے استعمال میں کمی لائی جا سکے۔
مزید پڑھیں: افغان طالبان کی بلااشتعال جارحیت کا مؤثر جواب، خیبرپختونخوا کے عوام کا افواجِ پاکستان سے اظہارِ یکجہتی
جبکہ اس کے متبادل کے طور پر آن لائن کلاسز کو ترجیح دی جائے گی۔
شفیع جان نے مزید کہا کہ پیٹرول پمپس کی روزانہ بنیادوں پر نگرانی کی جائے گی اور ذخیرہ اندوزی کے خلاف سخت کارروائی عمل میں لائی جائے گی۔
ساتھ ہی کسانوں اور گندم کی کٹائی کے لیے ڈیزل کی فراہمی یقینی بنانے کا فیصلہ بھی کیا گیا ہے۔
ان کا کہنا تھا کہ صوبائی حکومت عوام پر اضافی بوجھ ڈالے بغیر ایندھن کی بچت اور معیشت کے تحفظ کی پالیسی پر مؤثر عملدرآمد کو یقینی بنائے گی۔
