یومِ شہادت حضرت علیؓ کے موقع پر جلوسوں اور مجالس کی مؤثر حفاظت کے حوالے سے وفاقی وزیر داخلہ محسن نقوی سے پاکستان بھر سے تعلق رکھنے والے اہلِ تشیع کے جید علمائے کرام نے ملاقات کی جس میں موجودہ صورتحال کے تناظر میں سیکیورٹی امور اور جلوسوں کے انتظامات پر تفصیلی تبادلہ خیال کیا گیا۔
ملاقات کے دوران فیصلہ کیا گیا کہ 21 رمضان المبارک کو یومِ شہادت حضرت علیؓ کے موقع پر ملک بھر میں نکالے جانے والے تمام جلوس نمازِ مغرب تک ختم کیے جائیں گے جبکہ دیگر جلوسوں کے دورانیے کو بھی کم کرنے پر اتفاق کیا گیا۔
یہ بھی پڑھیے: آج امت مسلمہ کے لیے سوگوار دن، شہری احتجاج کے دوران قانون ہاتھ میں نہ لیں، محسن نقوی
وفاقی وزیر داخلہ محسن نقوی نے اس موقع پر کہا کہ عزاداروں کی حفاظت اور سہولت کے لیے ہر ممکن اقدامات کیے جائیں گے۔ انہوں نے کہا کہ علمائے کرام نے ہمیشہ مشکل وقت میں پاکستان کا بھرپور ساتھ دیا ہے۔
محسن نقوی کا کہنا تھا کہ آج پاکستان ایک بار پھر علما سے اتحاد و اتفاق کا تقاضا کر رہا ہے اور موجودہ حالات میں علما کو بھائی چارے اور یکجہتی کے فروغ میں اپنا کردار ادا کرنا ہوگا۔
یہ بھی پڑھیے: افغان طالبان کی جارحیت ناقابل برداشت، مسلح افواج نے منہ توڑ جواب دیا، محسن نقوی
اس موقع پر اہلِ تشیع کے جید علمائے کرام نے حکومت پاکستان کے ساتھ ہر ممکن تعاون کی یقین دہانی کراتے ہوئے کہا کہ دشمن کی سازشوں کو اتحاد اور اتفاق کی قوت سے ناکام بنایا جائے گا۔
وفاقی وزیر داخلہ نے بھرپور تعاون کی یقین دہانی پر تمام علمائے کرام کا شکریہ ادا کیا۔ اس موقع پر وفاقی سیکرٹری داخلہ خرم آغا بھی موجود تھے۔
