معروف اداکارہ نادیہ جمیل نے انکشاف کیا ہے کہ انہیں بالی ووڈ کی سپر ہٹ فلم ’ویر زارا‘ میں کام کی پیشکش ہوئی تھی مگر وہ اس فلم میں کام نہیں کر سکیں۔
نادیہ جمیل حال ہی میں ایک نجی ٹی وی کی رمضان ٹرانسمیشن میں شریک ہوئیں جہاں انہوں نے ماں بننے کے بعد پیش آنے والی ذمہ داریوں اور اپنے کیرئیر کے ابتدائی فیصلوں پر گفتگو کی۔ انہوں نے بتایا کہ انہیں فلم ’ویر زارا‘ میں کام کرنے کی پیشکش ہوئی تھی اور پراجیکٹ تقریباً فائنل ہو چکا تھا لیکن اس وقت ان کا بچہ صرف 3 ماہ کا تھا۔
View this post on Instagram
نادیہ نے کہا کہ وہ اپنے بچے کو چھوڑ کر فلم کی شوٹنگ کے لیے نہیں جانا چاہتی تھیں کیونکہ انہیں لگتا تھا کہ ابتدائی مہینوں میں بچے کے ساتھ رہنا ان کے لیے سب سے اہم ہے۔
اداکارہ نے یہ بھی بتایا کہ اس وقت ان کی والدہ نے پیشکش کی کہ وہ شوٹنگ کے دوران ان کے ساتھ جائیں گی اور سسرال والوں کو بھی اس معاملے پر کوئی اعتراض نہیں تھا۔ بہت سے لوگوں نے کہا کہ اتنی بڑی فلم سے انکار کرنا کیرئیر کے لیے نقصان دہ ہو سکتا ہے لیکن انہوں نے اپنے بچے کے ساتھ رہنے کا فیصلہ کیا۔
یہ بھی پڑھیں: معمر رانا کو بالی ووڈ سے کتنی آفرز آئیں؟
نادیہ جمیل نے مزید کہا کہ اگرچہ وہ فلم کا حصہ نہیں بن سکیں، لیکن اس دوران ہدایتکار یش چوپڑا اور ان کے خاندان سے دوستی قائم ہوئی جو آج تک برقرار ہے۔
واضح رہے کہ 2004 میں ریلیز ہونے والی بلاک بسٹر فلم ’ویر زارا‘ میں شاہ رخ خان اور پریتی زنٹا نے مرکزی کردار ادا کیے تھے جبکہ پاکستانی وکیل سمیعہ صدیقی کا اہم کردار اداکارہ رانی مکھرجی نے نبھایا تھا۔
