ڈپٹی کمشنر اسلام آباد عرفان نواز میمن نے کہا ہے کہ وفاقی دارالحکومت میں ٹیکسیوں کی رجسٹریشن کا عمل جاری ہے، جبکہ موٹر سائیکلوں پر لگایا جانے والا ایم ٹیگ اتر جانے یا چوری ہونے کی صورت میں دوبارہ مفت فراہم کیا جائےگا۔
اسلام آباد میں گفتگو کرتے ہوئے انہوں نے کہاکہ ایم ٹیگ چوری ہونے کی صورت میں ہیلپ لائن پر کال کرکے اسے بلاک کرایا جا سکتا ہے۔
ایم ٹیگ اگر کسی کی موٹر سائیکل سے اتر جائے یا چوری ہو جائے تو اسے دوبارہ مفت فراہم کیا جائے گا،ڈپٹی کمشنر اسلام آباد عرفان نواز میمن pic.twitter.com/xY6Y1oeVSZ
— WE News (@WENewsPk) March 11, 2026
انہوں نے کہاکہ شہری اپنی موٹر سائیکل کا رجسٹریشن نمبر اور رسید نمبر فراہم کریں گے تو متعلقہ نظام کے ذریعے ڈیوائس کو بلاک کر دیا جائے گا تاکہ اس کا غلط استعمال نہ ہو سکے۔
ڈپٹی کمشنر کے مطابق اس سیکیورٹی سسٹم کا بنیادی مقصد شہریوں کی حفاظت اور سیکیورٹی کو بہتر بنانا ہے۔
انہوں نے کہاکہ اس نظام میں مختلف جدید فیچرز موجود ہیں جن کے ذریعے موٹر سائیکل سے متعلق معلومات محفوظ رہتی ہیں اور سکیورٹی اداروں کو مدد ملتی ہے۔
عرفان نواز میمن نے بتایا کہ اسلام آباد میں ٹیکسیوں کی رجسٹریشن کا عمل بھی شروع کردیا گیا ہے اور اب تک قریباً 19 ہزار ٹیکسیاں رجسٹرڈ کی جا چکی ہیں۔
انہوں نے کہاکہ ٹیکسی ڈرائیورز کو پابند کیا جا رہا ہے کہ وہ سواری بٹھاتے وقت اس کی معلومات درج کریں کہ کہاں سے اٹھایا اور کہاں چھوڑا گیا۔
انہوں نے مزید کہاکہ دنیا کے بیشتر ممالک میں بغیر لائسنس ٹیکسی چلانے کی اجازت نہیں ہوتی، اسی طرز پر اسلام آباد میں بھی سسٹم متعارف کرایا جا رہا ہے اور خلاف ورزی کرنے والوں کے خلاف کارروائی کی جائے گی۔
مزید پڑھیں: اسلام آباد میں ایم ٹیگ رجسٹریشن تیز، نئی چپ جلد متعارف کرائی جائے گی
ڈپٹی کمشنر اسلام آباد نے سوشل میڈیا پر شہر میں خطرات یا سیکیورٹی خدشات سے متعلق چلنے والی خبروں کو بے بنیاد قرار دیتے ہوئے کہاکہ سرکاری سطح پر اس حوالے سے کوئی تصدیق نہیں ہے اور شہری افواہوں پر توجہ نہ دیں۔
