پاکستان پیپلز پارٹی کی رہنما اور سینیٹر پلوشہ خان نے کہا ہے کہ موجودہ حالات میں صرف بیوروکریسی کی ایک دن کی تنخواہ نہ لینا کافی نہیں بلکہ کفایت شعاری کے اقدامات کو مزید مؤثر اور وسیع بنانا ناگزیر ہے۔
یہ بھی پڑھیں: بلوچستان حکومت کا بڑا کفایت شعاری پیکج، اخراجات میں نمایاں کمی کے لیے اہم فیصلے
وی نیوز سے گفتگو کرتے ہوئے وزیراعظم شہباز شریف کے کفایت شعاری اقدامات سے متعلق سوال کے جواب میں انہوں نے کہا کہ یہ اقدام ایک ابتدائی قدم ضرور ہے، تاہم ملک کو درپیش معاشی اور سیکیورٹی چیلنجز کے پیش نظر کفایت شعاری پالیسی کا دورانیہ اور دائرہ کار بڑھایا جانا چاہیے کیونکہ یہ واضح نہیں کہ موجودہ صورتحال کب تک جاری رہے گی۔
بیوروکریسی کا ایک دن کی تنخواہ نہ لینا کافی نہیں، کفایت شعاری کے اقدامات کا دائرہ وسیع ہونا چاہیے، پلوشہ خان pic.twitter.com/aF6YGEUzYL
— WE News (@WENewsPk) March 11, 2026
پلوشہ خان نے وزیراعلیٰ خیبر پختونخوا سہیل آفریدی کے حلقے میں شہریوں کے اسلحہ لے کر گھومنے اور سڑکوں پر ناکے لگانے کی اطلاعات پر تشویش کا اظہار کرتے ہوئے کہا کہ خطے میں کشیدہ صورتحال کے باعث ایسے واقعات تشویشناک ہیں۔ ان کا کہنا تھا کہ افغانستان کے ساتھ کشیدگی کے تناظر میں ملک پہلے ہی حساس حالات سے گزر رہا ہے، اس لیے متعلقہ اداروں کو فوری نوٹس لینا چاہیے۔
یہ بھی پڑھیں: پلوشہ خان کی علیم خان کے خلاف تحریک استحقاق، اتحادیوں کے بیچ بدمزگی
انہوں نے مزید کہا کہ خیبر پختونخوا حکومت کو موجودہ حالات میں قومی سطح پر ذمہ دارانہ کردار ادا کرنا چاہیے اور امن و استحکام کے لیے اپنی مکمل صلاحیتیں بروئے کار لانی چاہئیں۔
