وزیراعلیٰ بلوچستان میر سرفراز بگٹی نے صوبے میں جدید اور ماحول دوست ٹرانسپورٹ کے فروغ کے لیے آسان اقساط پر الیکٹرک بائیکس اسکیم کا باضابطہ افتتاح کر دیا۔ اس منصوبے کا مقصد طلبہ و طالبات، ورکنگ وومن اور عام شہریوں کو کم خرچ اور بہتر سفری سہولیات فراہم کرنا ہے تاکہ روزمرہ آمد و رفت کو آسان بنایا جا سکے۔
وزیراعلیٰ کے مطابق حکومت بلوچستان عوام کو جدید اور پائیدار سفری سہولیات فراہم کرنے کے لیے عملی اقدامات کر رہی ہے اور الیکٹرک بائیکس اسکیم اسی سلسلے کی ایک اہم کڑی ہے۔ ان کا کہنا تھا کہ اس منصوبے کے تحت طلبہ، ملازمت پیشہ خواتین اور دیگر شہریوں کو آسان اقساط پر الیکٹرک بائیکس فراہم کی جائیں گی تاکہ وہ اپنی تعلیمی، پیشہ ورانہ اور روزمرہ سرگرمیوں کے لیے بہتر ٹرانسپورٹ حاصل کر سکیں۔
حکومت بلوچستان سے الیکٹرک بائیکس حاصل کرنے کا طریقہ کار
وزیراعلیٰ نے واضح کیا کہ اس اسکیم میں شفافیت اور میرٹ کو ہر صورت یقینی بنایا جائے گا۔ ان کے مطابق درخواست دہندگان کا انتخاب قرعہ اندازی کے شفاف طریقہ کار کے ذریعے کیا جائے گا، جبکہ صوبے کے تمام اضلاع کے شہری آن لائن درخواست دے سکیں گے۔ اس طریقہ کار کا مقصد زیادہ سے زیادہ مستحق افراد تک اس سہولت کو پہنچانا ہے۔
یہ بھی پڑھیے آسان اقساط پر الیکٹرک اسکوٹیز کی فراہمی، بلوچستان حکومت اور نیشنل بینک کے درمیان معاہدہ
سرفراز بگٹی نے بتایا کہ اس اسکیم کے تحت فراہم کی جانے والی الیکٹرک بائیکس ایک مرتبہ چارج ہونے پر 70 سے 100 کلومیٹر تک سفر کر سکیں گی، جو طلبہ، ملازمت پیشہ افراد اور عام شہریوں کے لیے انتہائی مفید ثابت ہوں گی۔ انہوں نے کہا کہ اس منصوبے سے نہ صرف شہریوں کو سستی اور قابلِ اعتماد سفری سہولت میسر آئے گی بلکہ ایندھن کی بچت اور ماحول کے تحفظ میں بھی مدد ملے گی۔
الیکٹرک لوڈرز متعارف کرانے کی تجویز
وزیراعلیٰ کا کہنا تھا کہ حکومت صوبے میں جدید اور ماحول دوست ٹرانسپورٹ کے فروغ کے لیے مزید منصوبوں پر بھی غور کر رہی ہے۔ انہوں نے بتایا کہ آئندہ مرحلے میں الیکٹرک لوڈرز متعارف کرانے کی تجویز زیرِ غور ہے تاکہ چھوٹے کاروبار اور محنت کش طبقے سے وابستہ افراد کو بھی کم لاگت اور جدید ٹرانسپورٹ فراہم کی جا سکے۔
یہ بھی پڑھیے ہر گھر کی ضرورت اسکوٹی بنتی کیسے ہے؟
انہوں نے اس عزم کا اعادہ کیا کہ حکومت بلوچستان عوام کو جدید سہولیات کی فراہمی اور صوبے میں پائیدار ترقی کے لیے اقدامات جاری رکھے گی۔ ان کے مطابق الیکٹرک بائیکس اسکیم نہ صرف نوجوانوں اور خواتین کے لیے سفری آسانیاں پیدا کرے گی بلکہ صوبے میں ماحول دوست ٹرانسپورٹ کلچر کو فروغ دینے میں بھی اہم کردار ادا کرے گی۔
