وزیراعظم محمد شہباز شریف نے اسلامو فوبیا کے تدارک کے عالمی دن کے موقع پر اپنے پیغام میں کہا ہے کہ آج کا دن دین اسلام اور مسلمانوں کے خلاف تعصب اور نفرت انگیز رویوں کے خلاف عالمی سطح پر آواز بلند کرنے کی علامت ہے۔
وزیراعظم نے کہا کہ اقوام متحدہ جنرل اسمبلی کی جانب سے اسلامو فوبیا کے تدارک سے متعلق منظور کی گئی قرارداد دنیا بھر میں مسلمانوں کے خلاف امتیازی اور نفرت انگیز سلوک کی حوصلہ شکنی کا اہم ذریعہ ہے۔
یہ بھی پڑھیے: وزیراعظم شہباز شریف کا لبنانی وزیراعظم کو ٹیلیفون، اسرائیلی جارحیت کی مذمت، یکجہتی کا اظہار
انہوں نے کہا کہ بنیادی مذہبی آزادی کی عدم برداشت، باہمی اتحاد اور رواداری جیسی اقدار کو کمزور کرتی ہے، جبکہ مہذب معاشرے عقائد کی بنیاد پر انسانی حقوق میں تفریق نہیں کرتے بلکہ باہمی احترام اور برداشت کے اصولوں پر قائم ہوتے ہیں۔
وزیراعظم کا کہنا تھا کہ اسلامو فوبیا کے تدارک کا عالمی دن مسلمانوں کو مذہبی تعصب اور متشدد واقعات کے خلاف تحفظ فراہم کرنے کے عالمی عزم کی یاد دہانی بھی ہے۔
انہوں نے کہا کہ پاکستان اسلامو فوبیا پر مبنی ہر قسم کے رویوں اور اس کی تمام صورتوں کی مذمت کرتا ہے۔ اسلامی تعلیمات اور بین الاقوامی قوانین دونوں کی روشنی میں تمام انسان مساوی حقوق رکھتے ہیں۔
یہ بھی پڑھیے: نیویارک کے میئر امیدوار ظہران ممدانی کو ابتدائی جیت کے بعد اسلاموفوبیا کا سامنا
وزیراعظم نے اپنے پیغام میں کہا کہ دین اسلام پوری انسانیت کے لیے امن، رواداری اور ہم آہنگی کا پیغام دیتا ہے اور اسلام کو انتہا پسند نظریات سے جوڑنا صریح لاعلمی ہے۔
انہوں نے کہا کہ پاکستان نے ہمیشہ بین الاقوامی فورمز پر ذمہ دارانہ انداز میں اسلامو فوبیا کے خلاف آواز بلند کی ہے اور آئندہ بھی پاکستان اقوام عالم کے درمیان مذہبی رواداری کے فروغ اور مسلمانوں کے احساسِ تحفظ کے لیے اپنی کوششیں جاری رکھے گا۔
