بیوی اور 5 بچوں کو مبینہ طور پر ’ناموس‘ کے لیے قتل کرنے کے بعد خودکشی کی کوشش کرنیوالے شخص کو سرگودھا پولیس نے پیر کے روز گرفتار کرلیا ہے۔
6 افراد کے قتل کا افسوسناک واقعہ پنجاب کے ضلع سرگودھا کے چک 25 ساؤتھ علاقے سے رپورٹ ہوا، جس میں ملوث مرکزی ملزم سمیت مقدمے میں نامزد ایک اور شخص کو بھی گرفتار کیا گیا ہے۔
مذکورہ واقعہ پر بھگتّن والا پولیس اسٹیشن میں ابتدائی شکایت کے طور پر ایف آئی آر درج کی گئی۔
شکایت مقتولہ کے بھائی کی جانب سے کی گئی، اور اس میں پاکستان پینل کوڈ کی دفعات 302 (قتل عمد)، 311 (قتل عمد کے بعد تعزیر)، اور 322 (قتل بے سبب) شامل کی گئیں۔
یہ بھی پڑھیں: غیرت کے نام پر قتل خلاف اسلام قرار، اسلامی نظریاتی کونسل نے اہم قانونی معاملات پر رائے دیدی
مقتولین میں ملزم کی بیوی، اس کی 16 سالہ بیٹی، 3 بیٹے جن کی عمریں 5 سے 13 سال جبکہ ایک چند ماہ کا بیٹا شامل ہیں۔
ایف آئی آر کے مطابق مقتولہ کے بھائی نے بتایا کہ وہ اور اس کے ہمراہ لوگ اپنی بہن سے ملاقات اور عیدی دینے کے لیے گھر پہنچے۔
مرکزی گیٹ اندر سے بند تھا اور اندر سے چیخیں سنائی دے رہی تھیں۔
بھائی نے بتایا کہ جب انہوں نے دیوار کے اوپر سے جھانک کر دیکھا تو مرکزی ملزم اپنی بہن اور بچوں پر کلہاڑی سے حملہ کر رہا تھا۔
مزید پڑھیں: راولپنڈی: بہانے سے پاکستان بلوائی گئی خاتون کا غیرت کے نام پر قتل
جب ملزم نے انہیں آتے دیکھا تو اس نے خود کو بھی نقصان پہنچایا، بیوی اور بچے موقع پر ہی جاں بحق ہو گئے، جبکہ مرکزی ملزم زخمی ہوا۔
پولیس کے مطابق، ملزم نے یہ عمل غیرت کے نام پر کیا کیونکہ وہ اپنی بیوی اور بیٹی پر ایک مرد کے ساتھ غیر مناسب تعلقات کا شبہ کر رہا تھا۔
مقتولہ کے بھائی نے درخواست کی کہ اس کے بہنوئی اور دوسرے نامزد شخص کے خلاف قانونی کارروائی کی جائے۔
ڈسٹرکٹ پولیس آفیسر سرگودھا صہیب اشرف نے موقع پر پہنچ کر رپورٹ طلب کرلی ہے۔
مزید پڑھیں: غیرت کے نام پر قتل: رپورٹنگ بڑھی یا لرزہ خیز واقعات بڑھ گئے؟
ریسکیو 1122، فورینزک ماہرین اور کرائم سین یونٹ کی ٹیمیں بھی جائے وقوعہ پر موجود تھیں۔
انسانی حقوق کے وزیر اعظم نذیر تارڑ کے مطابق، 2021 سے 2024 کے درمیان ملک میں 7,500 سے زائد خواتین قتل ہو چکی ہیں، جن میں سے 1,553 غیرت کے نام پر تھیں۔
گزشتہ ماہ ایک نوجوان خاتون کو مبینہ طور پر اس کے بھائیوں اور والد نے قتل کیا تھا، جبکہ جنوری میں ٹیکسلا میں ایک خاتون نے مبینہ طور پر شوہر کو گھریلو تنازع کے بعد قتل کر دیا تھا۔
