ماہِ صیام کے اختتام کے قریب آتے ہی موسم نے خوشگوار رخ اختیار کر لیا ہے، اور محکمہ موسمیات نے عید کے دنوں میں بارشوں کی پیشگوئی کر دی ہے۔
مزید پڑھیں: سعودی سپریم کورٹ نے عام مسلمانوں سے عید کا چاند دیکھنے کی اپیل کیوں کی؟
وفاقی دارالحکومت اسلام آباد سمیت راولپنڈی اور گردونواح میں سحری کے وقت سے جاری بارش نے موسم کو مزید خوشگوار بنا دیا ہے، جبکہ ٹھنڈی ہواؤں کے باعث سردی کی ہلکی لہر بھی واپس آ گئی ہے۔
سیاحتی مقامات مری اور گلیات میں بارش اور ٹھنڈی ہواؤں نے موسم کو سرد بنا دیا ہے، جبکہ بالائی علاقوں میں برفباری کا سلسلہ بھی جاری ہے۔
استور، ہنزہ، خنجراب پاس اور وادی نیلم میں برفباری نے سردی کی شدت میں اضافہ کر دیا ہے۔
دوسری جانب پنجاب اور خیبرپختونخوا کے میدانی علاقوں میں بھی وقفے وقفے سے بارش جاری ہے، جبکہ سندھ اور بلوچستان میں مطلع ابر آلود رہنے اور بعض مقامات پر بارش کا امکان ظاہر کیا گیا ہے۔
مزید پڑھیں: عیدالفطر: سعودی باشندے اپنے اہل خانہ کو زیادہ تر کون سا تحفہ دیتے ہیں؟
محکمہ موسمیات کے مطابق موجودہ بارشوں کا سلسلہ وقفے وقفے سے عید تک جاری رہ سکتا ہے، جس سے عید کے دنوں میں موسم خوشگوار رہنے کی توقع ہے۔
