آزاد جموں و کشمیر الیکشن کمیشن نے سالانہ اثاثہ جات کی تفصیلات جمع نہ کرانے پر 3 اراکین قانون ساز اسمبلی کی رکنیت معطل کردی ہے۔
الیکشن کمیشن کی جانب سے جاری پریس ریلیز کے مطابق آزاد جموں و کشمیر الیکشنز ایکٹ 2020 کی دفعہ 78 کے تحت ہر رکن اسمبلی پر لازم ہے کہ وہ ہر سال 10 جون سے قبل اپنے اور زیر کفالت اہلخانہ کے اثاثوں کی تفصیل جمع کرائے۔
یہ بھی پڑھیں: آزاد کشمیر میں بروقت الیکشن کی راہ ہموار، غلام مصطفیٰ مغل نے چیف الیکشن کمشنر کا حلف اٹھالیا
کمیشن کے مطابق اراکین اسمبلی کو 15 جنوری 2026 اور 24 فروری 2026 کو یاددہانی بھی جاری کی گئی تھی اور مزید 10 دن کی مہلت دی گئی تھی، تاہم اس کے باوجود 3 اراکین نے مالی سال 2024-2025 کے اثاثہ جات کی تفصیل جمع نہیں کروائی۔
جن اراکین کی رکنیت معطل کی گئی ان میں محمد اکمل سرگالہ حلقہ LA-37 جموں، غلام محی الدین دیوان حلقہ LA-41 ویلی اور محمد اقبال مخصوص نشست برائے اوورسیز پاکستانی شامل ہیں۔
یہ بھی پڑھیں: آزاد کشمیر: الیکشن سے قبل پی ٹی آئی کو نئے امتحان کا سامنا، پارٹی کے 2 دعویدار سامنے آگئے
الیکشن کمیشن کے مطابق متعلقہ اراکین کی رکنیت اس وقت تک معطل رہے گی جب تک وہ اپنے اثاثوں کی تفصیلات جمع نہیں کراتے۔
