پاکستان تحریک انصاف (پی ٹی آئی) نے عمران خان کے بیٹوں کو اپنے والد سے ملاقات کی اجازت نہ دینے اور ویزا میں غیر معمولی تاخیر پر شدید تشویش کا اظہار کیا ہے۔
پارٹی کے مرکزی میڈیا ڈیپارٹمنٹ کے مطابق جمائمہ گولڈ اسمتھ کی جانب سے سامنے آنے والی تفصیلات نہ صرف تشویشناک ہیں بلکہ یہ موجودہ حکومت کی انسانی اقدار اور خاندانی حقوق کی خلاف ورزی کا واضح ثبوت ہیں۔
ویزا جاری کرنے میں تاخیر پر احتجاج
پی ٹی آئی کا کہنا ہے کہ 2 ماہ سے زائد عرصہ گزرنے کے باوجود ویزا جاری نہ ہونا جبکہ سرکاری طور پر 7 سے 10 دن کی مدت بتائی گئی تھی ایک دانستہ تاخیری حربہ ہے جس کا مقصد سیاسی انتقام ہے۔
ملاقات اور رابطے کی پابندی
پارٹی نے مزید کہا کہ نہ صرف بیٹوں کو پاکستان آنے کی اجازت نہیں دی جا رہی بلکہ انہیں اپنے والد سے فون یا خط کے ذریعے رابطے کی سہولت سے بھی محروم رکھا گیا ہے جو کسی بھی مہذب معاشرے کے اصولوں کے منافی ہے۔
عطا تارڑ کے مؤقف پر ردعمل
پی ٹی آئی نے اس بات کی نشاندہی کی کہ عطا تارڑ کے مطابق چونکہ بیٹے (این آئی سی او پی) نکوپ رکھتے ہیں اس لیے وہ پاکستان آ سکتے ہیں مگر حقیقت یہ ہے کہ دونوں بیٹوں نے کافی عرصہ قبل اپنے نکوپ یعنی قومی شناختی کارڈ برائے اوورسیز پاکستانی کی تجدید کے لیے درخواست دی تھی جس پر تاحال کوئی جواب نہیں دیا گیا۔
پی ٹی آئی کے مطابق یہ خاموشی اور تاخیر حکومتی بدنیتی کو ظاہر کرتی ہے۔
پی ٹی آئی کی اپیل
پارٹی نے موجودہ حکومت سے مطالبہ کیا ہے کہ فوری طور پر عمران خان کے بیٹوں کو اپنے والد سے ملاقات کی اجازت دی جائے خصوصاً اس صورتحال میں جب ان کی صحت کے حوالے سے بھی تشویش پائی جا رہی ہے۔
تحریک انصاف نے واضح کیا کہ خاندانی رشتوں کو سیاسی انتقام کی نذر کرنا غیر اخلاقی اور انسانی حقوق کی کھلی خلاف ورزی ہے جسے کسی صورت قبول نہیں کیا جا سکتا۔
