وزیراعلیٰ پنجاب مریم نواز شریف نے عیدالفطر سے قبل مسافروں سے زائد کرایہ وصول کرنے والے ٹرانسپورٹرز کے خلاف سخت کارروائی کا حکم دے دیا ہے تاکہ عوام کو ریلیف فراہم کیا جا سکے۔
لاہور میں جاری ہدایات کے مطابق وزیر اعلیٰ پنجاب نے حکام کو تمام اضلاع میں سرکاری مقررہ کرایوں پر سختی سے عملدرآمد یقینی بنانے کی ہدایت کی ہے۔
انہوں نے واضح کیا کہ اوورچارجنگ میں ملوث ٹرانسپورٹرز کے خلاف فوری قانونی کارروائی کی جائے گی۔
یہ بھی پڑھیے وزیراعلیٰ پنجاب مریم نواز کے زرعی شعبے کی ترقی کے لیے انقلابی فیصلے
وزیر اعلیٰ نے ڈپٹی کمشنرز کو ہدایت دی ہے کہ وہ ٹرانسپورٹ کے نظام کی کڑی نگرانی کریں تاکہ زائد کرایہ وصولی اور ٹکٹوں کی بلیک مارکیٹنگ کو روکا جا سکے۔
مزید برآں تمام بس اڈوں پر کرایہ نامے نمایاں طور پر آویزاں کرنے کا حکم بھی دیا گیا ہے۔
مسافروں کے لیے افطار اور سہولیات کی ہدایت
مریم نواز شریف نے رمضان کے دوران سفر کرنے والے روزہ دار مسافروں کے لیے افطار کے انتظامات کرنے کی بھی ہدایت کی ہے۔
انہوں نے ویٹنگ ایریاز میں مناسب نشستوں اور پنکھوں کی دستیابی یقینی بنانے کا بھی حکم دیا۔
بس اڈوں پر صفائی اور مسلسل نگرانی
وزیر اعلیٰ نے بس اڈوں پر صفائی ستھرائی کے انتظامات بہتر بنانے اور ٹرانسپورٹ ڈیپارٹمنٹ کو مسلسل فیلڈ انسپکشنز کرنے کی ہدایت کی ہے تاکہ عوام کو زیادہ سے زیادہ سہولت فراہم کی جا سکے۔
عید کی خریداری کے پیش نظر بازاروں اور مارکیٹوں میں سیکیورٹی بڑھانے اور شرپسند عناصر کی نقل و حرکت روکنے کے لیے بھی خصوصی ہدایات جاری کی گئی ہیں۔
یہ بھی پڑھیں وزیراعلیٰ پنجاب مریم نواز کا کرائم کنٹرول ڈیپارٹمنٹ کو پریمیئر انوسٹی گیشن ایجنسی بنانے کا فیصلہ
وزیر اعلیٰ پنجاب نے اس بات پر زور دیا کہ عید پر گھروں کو جانے والے غریب مسافروں کا کسی صورت استحصال نہ ہونے دیا جائے۔
انہوں نے ایک بار پھر ہدایت کی کہ کرایہ نامے واضح طور پر آویزاں کیے جائیں اور خلاف ورزی کرنے والوں کے خلاف فوری کارروائی عمل میں لائی جائے۔
