معروف ہدایتکار مہرین جبار کی نئی سیریز ’فرار‘ عید پر ریلیز ہو رہی ہے۔
چھ اقساط پر مشتمل یہ سیریز ہدایتکارہ کے 1990 کی دہائی کے ٹیلی فلم فرار کا نیا روپ ہے۔ اصل ٹیلی فلم بھارتی نیٹ ورک Zee5 کے لیے بنائی گئی تھی جبکہ نئی سیریز 21 مارچ سے پاکستانی اسٹریمنگ پلیٹ فارم Begin پر بھی دستیاب ہوگی۔
View this post on Instagram
سیریز کی کہانی تین خواتین کے گرد گھومتی ہے، جن کے رشتے اور دوستی چھپے راز، ذاتی امنگوں اور کراچی کی زندگی کی پیچیدگیوں کی وجہ سے آزمائش میں آ جاتے ہیں۔
صبرینہ ایک بیوہ ہیئر ڈریسر ہیں جو اپنے الجھے ہوئے تعلقات اور روزمرہ کے مسائل سے نبردآزما ہیں۔ تانیہ ایک ابھرتی ہوئی اداکارہ ہیں جو اپنے جسمانی تاثر اور ذاتی شناخت کے مسائل کا سامنا کر رہی ہیں۔ جبکہ ہما ایک پرعزم ایتھلیٹ ہیں جو شادی کے سماجی دباؤ اور کراچی کی زندگی کی اتار چڑھاؤ سے گذر رہی ہیں۔
یہ بھی پڑھیں: کنگ آف پاپ کی داستان، فلم ‘مائیکل’ کا فرسٹ لک سامنے آگیا، فلم کب ریلیز ہوگی؟
سیریز کا ٹریلر انسٹاگرام پر جاری کیا گیا ہے جو اس قریبی گروپ کی زندگی، کام، دوستیاں اور چھوٹی چھوٹی شرارتوں کی جھلک پیش کرتا ہے۔ اس کی ٹائٹل لائن ہے ’زندگی الجھی ہوئی ہے، لیکن دوستوں کا حلقہ مضبوط ہے‘۔
سیریز میں ثروت گیلانی، طوبیٰ صدیقی، مریم سلیم، ماہا حسن، سلیم میراج، زاہد احمد اور حنا خواجہ بیات مرکزی کردار ادا کر رہے ہیں۔ اسکرپٹ رضا بلال نے تحریر کیا ہے جو پہلے بھی زخم اور جانِ جہاں جیسی کامیاب سیریز کے لیے جانے جاتے ہیں جبکہ ہدایتکاری کے فرائض مہرین جبّار نے انجام دیے ہیں۔
