کیپیٹل ڈویلپمنٹ اتھارٹی (سی ڈی اے) نے شہر کے تمام رہائشیوں کے لیے نیا حکم جاری کرتے ہوئے ہدایت دی ہے کہ وہ 6 ماہ کے اندر اپنی رہائشی اور کمرشل عمارتوں میں واٹر ہارویسٹنگ سسٹم نصب کریں، بصورت دیگر سخت کارروائی کا سامنا کرنا ہوگا۔
یہ بھی پڑھیں:سی ڈی اے اور نیشنل پریس کلب کے زیراہتمام شجر کاری مہم، ماحول دوست درخت لگائے گئے
سی ڈی اے حکام کے مطابق اس نظام کے ذریعے عمارتوں اور چھتوں سے بارش کا پانی جمع کر کے زمین میں واپس پہنچایا جائے گا تاکہ پانی کے ذخائر کو محفوظ بنایا جا سکے۔ نئی پالیسی کے تحت یہ سسٹم نئی تعمیر ہونے والی عمارتوں کے نقشوں میں شامل کرنا بھی لازمی قرار دے دیا گیا ہے۔
یہ ہدایت صرف گھروں اور کمرشل عمارتوں تک محدود نہیں بلکہ فارم ہاؤسز، سرکاری عمارتوں، کھیل کے میدانوں اور دیہی علاقوں پر بھی لاگو ہوگی۔
یہ بھی پڑھیں:اسلام آباد میں درختوں کی کٹائی کی منظوری کس نے دی؟ سی ڈی اے عدالت کو بتادیا
حکام کا کہنا ہے کہ 6 ماہ کی مہلت ختم ہونے کے بعد سی ڈی اے کی ٹیمیں گھر گھر جا کر معائنہ کریں گی۔ ہدایات پر عمل نہ کرنے والوں کے خلاف بھاری جرمانے سمیت سخت قانونی کارروائی کی جائے گی۔
