خیبرپختونخوا کے ضلع شمالی وزیرستان میں دوسالی کے علاقے میں ہونے والے فائرنگ کے تبادلے میں دو دہشت گرد مارے گئے ہیں۔
افواج پاکستان کے محکمہ تعلقات عامہ انٹر سروسز پبلک ریلیشنز (آئی ایس پی آر) کی جانب سے جاری ایک بیان میں کہا گیا ہے کہ شمالی وزیرستان کے علاقے دوسالی میں افواج پاکستان اور دہشت گردوں کے درمیان فائرنگ کا تبادلہ ہوا جس میں سیکیورٹی فورسز نے موثر طریقے سے دہشت گردوں کے ٹھکانوں کو نشانہ بنایا۔ دہشت گردوں کے فرار ہونے کے تمام ممکنہ راستوں کو سیل کر دیا گیا، جس کے نتیجے میں 2 دہشت گرد ہلاک ہو گئے۔
آئی ایس پی آر کا یہ بھی کہنا تھا کہ دہشت گردوں سے اسلحہ اور گولہ بارود بھی برآمد ہوا ہے۔ اس میں مزید کہا گیا کہ شرپسند سکیورٹی فورسز کے خلاف دہشت گردانہ سرگرمیوں اور بے گناہ شہریوں کے قتل میں بھی ملوث تھے۔بیان میں کہا گیا ہے کہ علاقے کو دہشت گردوں سے پاک کرنے کے لیے آپریشن جاری ہے۔
فوج کے میڈیا ونگ کا مزید کہنا ہے کہ کے مقامی لوگوں نے افواج پاکستان کے آپریشن کو سراہا اور علاقے سے دہشت گردی کی لعنت کو ختم کرنے کے لیے اپنی مکمل حمایت کا اعادہ کیا ہے۔
واضح رہے کہ سیکیورٹی فورسز اور دہشت گردوں کے درمیان جھڑپ ایک فوجی جوان کی شہادت کے دو دن بعد ہوا ہے۔ یہ فوجی جوان شمالی وزیرستان میں جاری پولیو مہم کو متاثر کرنے والے دہشت گردوں کے خلاف کارروائی کے دوران شہید ہو گیا تھا۔ آئی ایس پی آر کے مطابق دہشت گردوں نے شمالی وزیرستان کے علاقے ’سپن وام ‘ میں پولیو ٹیم کے ارکان پر فائرنگ کی تھی۔
تاہم پولیوٹیم کے ساتھ تعینات سیکیورٹی فورسز نے ‘ٹیم کے تمام ارکان کی حفاظت کو یقینی بناتے ہوئے دہشت گردوں کے ٹھکانے کو مؤثر طریقے سے تباہ کر دیا تھا۔ شہید سپاہی کی شناخت 25 سالہ سپاہی ثاقب الرحمان کے نام سے ہوئی ہے جو ضلع مردان کا رہائشی تھا۔
آئی ایس پی آر پاکستان کی سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور ہمارے بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔
