وزیراعلیٰ خیبر پختونخوا سہیل آفریدی ایک روزہ دورے پر کوئٹہ پہنچ گئے، جہاں ان کا پرتپاک استقبال کیا گیا۔
استقبال کرنے والوں میں ایم این اے عادل بازئی، کمشنر کوئٹہ، ڈی آئی جی پولیس کوئٹہ اور پاکستان تحریک انصاف کے کارکنان شامل تھے۔
دورے کے دوران وزیراعلیٰ سہیل آفریدی پی ٹی آئی کے شہدا کے گھروں کا دورہ کریں گے اور لواحقین سے اظہارِ تعزیت اور یکجہتی کریں گے۔
یہ بھی پڑھیں: کیا عید کے بعد وزیراعلیٰ سہیل آفریدی کی اسٹریٹ مہم میں تیزی آئے گی؟
اس کے علاوہ وہ ضلع پشین میں جلسۂ عام سے خطاب بھی کریں گے۔
اپنے قیام کے دوران وزیراعلیٰ پارٹی عہدیداران اور کارکنان سے ملاقاتیں کریں گے، جن میں تنظیمی امور اور آئندہ کی حکمت عملی پر تبادلہ خیال کیا جائے گا۔
مزید برآں وہ تحریک تحفظ آئین پاکستان کی قیادت سے بھی اہم ملاقات کریں گے، جس میں موجودہ سیاسی صورتحال اور آئینی معاملات زیرِ غور آئیں گے۔
موبائل نیٹ ورک سروس معطل
دوسری جانب سیکیورٹی خدشات کے پیش نظر بلوچستان کے چند شہروں میں موبائل نیٹ ورک سروس عارضی طور پر معطل کر دی گئی ہے۔
معاون محکمہ داخلہ بلوچستان بابر یوسفزئی کے مطابق یہ اقدام ممکنہ خطرات سے نمٹنے اور عوام کی حفاظت کو یقینی بنانے کے لیے کیا گیا ہے۔
بابر یوسفزئی نے عوام کو درپیش مشکلات پر معذرت کرتے ہوئے کہا کہ صوبائی حکومت کی اولین ترجیح شہریوں کے جان و مال کا تحفظ ہے۔
