پاکستان میں عالمی مارکیٹ میں تیل کی قیمتوں میں اضافے کے اثرات ظاہر ہونے لگے ہیں، جس کے پیشِ نظر مٹی کے تیل کی قیمت میں مزید 4 روپے 66 پیسے فی لیٹر اضافہ کر دیا گیا ہے۔
حکام کی جانب سے جاری کردہ نوٹیفکیشن کے مطابق مٹی کے تیل کی نئی قیمت 433 روپے 40 پیسے فی لیٹر ہو گئی ہے اور یہ اضافہ فوری طور پر نافذ العمل قرار دیا گیا ہے۔
یاد رہے کہ گزشتہ ہفتے بھی مٹی کے تیل کی قیمت میں 70 روپے 73 پیسے فی لیٹر کا اضافہ کیا گیا تھا۔
دوسری جانب پیٹرول اور ڈیزل کی قیمتیں برقرار رکھی گئی ہیں، پیٹرول کی فی لیٹر قیمت 321 روپے 17 پیسے اور ڈیزل کی قیمت 335 روپے 86 پیسے ہے۔
نوٹیفکیشن میں یہ بھی بتایا گیا ہے کہ حکومت پیٹرول پر آئل مارکیٹنگ کمپنیوں کو فی لیٹر 95 روپے 59 پیسے پی ڈی سی ادا کرے گی، جبکہ ڈیزل کے لیے یہ رقم 203 روپے 88 پیسے فی لیٹر مقرر کی گئی ہے۔
