وزیراعظم شہباز شریف کی ہدایت پر روشن ڈیجیٹل اکاؤنٹ کے دائرہ کار کو بڑھانے کا فیصلہ کر لیا گیا ہے، جس کے تحت اب غیر ملکی شہری اور کمپنیاں بھی روشن ڈیجیٹل اکاؤنٹس کھول کر حکومتی سیکیورٹیز میں سرمایہ کاری کر سکیں گے۔
وزیراعظم کا کہنا ہے کہ یہ اقدام پاکستان کو سرمایہ کاری کے لیے مزید پرکشش ملک بنائے گا۔
مزید پڑھیں: حکومت نے روشن ڈیجیٹل اکاؤنٹ اسکیم کو غیر ملکی سرمایہ کاروں تک توسیع دے دی
روشن ڈیجیٹل اکاؤنٹ کے دائرہ کار میں توسیع مالیاتی منڈیوں سے تعلقات مضبوط کرنے اور ڈیجیٹل پلیٹ فارم کے ذریعے غیر ملکی سرمایہ کاری کو فروغ دینے کی کوشش ہے۔ دنیا بھر میں ایک کروڑ دس لاکھ سے زائد بیرون ملک مقیم پاکستانی بڑی اور متحرک کمیونٹیز کا حصہ ہیں۔
اسٹیٹ بینک کے اعداد و شمار کے مطابق مالی سال 2025 میں ترسیلات زر 38.3 ارب ڈالر سے بڑھ گئی ہیں اور موجودہ مالی سال میں یہ رقم 42 ارب ڈالر تک پہنچنے کی توقع ہے۔
اس کے ساتھ ہی پاکستان ترسیلات زر حاصل کرنے والے ممالک میں پانچویں اور جنوبی ایشیا میں دوسرے نمبر پر آ گیا ہے۔
روشن ڈیجیٹل اکاؤنٹ کے ذریعے بیرون ملک مقیم پاکستانی بغیر پاکستان آئے بینک اکاؤنٹ کھول سکتے ہیں۔
گزشتہ ساڑھے 5 سال میں اس اسکیم نے نمایاں کامیابیاں حاصل کی ہیں، اور فروری 2026 تک نو لاکھ سے زائد اکاؤنٹس کھولے جا چکے ہیں، جن میں مجموعی سرمایہ کاری بارہ ارب ڈالر سے زائد ہو گئی ہے۔
مزید پڑھیں: روشن ڈیجیٹل اکاؤنٹ نے 12 ارب ڈالر کا سنگ میل عبور کر لیا
وزیراعظم شہباز شریف نے وزیر خزانہ، اسٹیٹ بینک اور پروگرام میں شامل بینکوں کو اس کامیابی پر مبارکباد دی اور کہا کہ پاکستان سرمایہ کاری کے لیے مزید مضبوط ملک بنے گا جبکہ مالیاتی منڈیوں میں توسیع ہوگی۔
وزیر خزانہ نے کہاکہ حکومتی اصلاحات سرمایہ کاروں کو شفاف، محفوظ اور سازگار ماحول فراہم کررہی ہیں۔
