پاکستان کے نائب وزیراعظم اور وزیر خارجہ اسحاق ڈار نے تصدیق کی ہے کہ سعودی عرب، ترکیہ اور مصر کے وزرائے خارجہ کل اسلام آباد میں ملاقات کریں گے۔
نجی ٹی وی سے گفتگو میں اسحاق ڈار نے بتایا کہ تینوں وزرائے خارجہ اگلے روز وزیراعظم شہباز شریف سے بھی ملاقات کریں گے۔
دوسری جانب ترجمان دفتر خارجہ نے بھی غیرملکی مہمانوں کی پاکستان آمد سے متعلق بیان جاری کیا ہے، جس میں کہا گیا ہے کہ سعودی عرب، ترکیہ اور مصر کے وزرائے خارجہ کل اسلام آباد پہنچیں گے۔
Looking forward to welcoming my brother Foreign Ministers of Saudi Arabia, Türkiye, and Egypt to Islamabad.@FaisalbinFarhan @HakanFidan @mfaEgypt pic.twitter.com/3LLsJyUobv
— Ishaq Dar (@MIshaqDar50) March 28, 2026
وزیر خارجہ اسحاق ڈار نے کہاکہ اصل ملاقات ترکیہ میں طے تھی، تاہم مصروفیات کی وجہ سے یہ اسلام آباد میں رکھی گئی ہے۔
انہوں نے مزید کہاکہ پاکستان ایمانداری اور نیک نیتی کے ساتھ تنازعات کے حل کی کوشش کررہا ہے اور اس مقصد کے لیے تمام دوست ممالک تعاون فراہم کررہے ہیں۔
اسحاق ڈار نے ایران کے ساتھ جاری مذاکرات کا ذکر کرتے ہوئے کہاکہ اس مرحلے پر میڈیا کے سامنے زیادہ بات کرنے سے گریز کیا جا رہا ہے۔
واضح رہے کہ حال ہی میں امریکا نے جنگ بندی کے لیے 15 نکاتی فارمولا پاکستان کے ذریعے ایران کو پیش کیا، جس کی تصدیق ایران نے کی اور پھر اپنا جواب بھی پاکستان کے ذریعے امریکہ تک پہنچایا گیا۔
پاکستان خطے میں قیام امن کے لیے ثالثی کا کردار ادا کررہا ہے، جسے عالمی سطح پر سراہا جا رہا ہے۔
