صوبہ خیبر پختونخوا کے ضلع باجوڑ کے علاقے ’مہمند‘ میں ریمورٹ کنٹرول بم دھماکے میں 2 افراد جاں بحق ہو گئے ہیں۔
باجوڑ کے ڈپٹی سپرنٹنڈنٹ آف پولیس (ڈی ایس پی) ستارخان نے بتایا ہے کہ دھماکا ایک پک اپ وین کے قریب ہوا، جس کے نتیجے میں اس وین کا ڈرائیور موقع پر ہی جاں بحق ہو گیا جب کہ گاڑی میں سوار ایک ٹھیکیدار بری طرح زخمی ہوا۔
یہ بھی پڑھیں شمالی وزیرستان: سیکیورٹی فورسز کی کارروائی، 2 دہشت گرد ہلاک
ڈی ایس پی نے مزید بتایا کہ لاش اور زخمیوں کو ڈسٹرکٹ ہیڈ کوارٹر اسپتال باجوڑ لے جایا گیا، جہاں ٹھیکیدار بھی زخموں کی تاب نہ لاتے ہوئے دم توڑ گیا۔ انہوں نے کہا کہ یہ واقعہ اس وقت پیش آیا جب جاں بحق افراد باجوڑ میں سیکیورٹی چیک پوسٹ کے لیے گاڑی میں ریت بھر کر لے جا رہے تھے۔ پولیس نے شبہ ظاہر کیا ہے کہ یہ ایک ریمورٹ بم دھماکا ہے جس کا مقصد سیکیورٹی فورسسز کو نشانہ بنانا تھا۔
واضح رہے کہ کچھ عرصے سے خیبر پختونخوا میں دہشت گردی کی کارروائیاں سامنے آ رہی ہیں اور اب سیکیورٹی فورسز کی جانب سے معمول کے ساتھ انٹیلی جینس بیسڈ آپریشن کیے جا رہے ہیں جن میں متعدد دہشت گردوں کو ہلاک کیا گیا ہے۔
