مصر کی سرحد کے قریب ایک مسلح گروپ اور اسرائیلی فوجیوں کے درمیان جھڑپ کے دوران 3 اسرائیلی فوجی ہلاک ہو گئے ہیں جب کہ حملہ آور ایک شخص بھی اسرائیلی افواج کی فائرنگ سے مارا گیا ہے۔
اسرائیل فوج کے ایک ترجمان نے واقعے کی تصدیق کرتے ہوئے الزام لگایا کہ مصر کی سرحد سے ایک مسلح گروہ نے اسرائیلی علاقے میں گھس کر اسرائیلی فوجیوں پر گولیاں برسانا شروع کر دیں جس کے نتیجے میں 3 اسرائیلی فوجی موقع پر ہی ہلاک ہو گئے جب کہ جوابی کارروائی میں ایک حملہ آور بھی مارا گیا ہے۔
ادھر مصرکے ذرائع نے بتایا ہے کہ یہ مسلح گروہ ممکنہ طور پر اسمگلر ہو سکتے ہیں جنہوں نے اسرائیلی سیکیورٹی فورسسز کے گھیرے میں آنے کے نتیجے میں فائرنگ کا تبادلہ کیا۔
ایک اور اسرائیلی فوجی ترجمان نے دعویٰ کیا کہ 2 اسرائیلی فوجیوں کو ہفتے کی صبح ڈیوٹی کے دوران گولی مار ہلاک کیا گیا جن کی لاشیں بعد میں تلاشی کے دوران ملیں۔جب کہ بعد میں اسرائیلی فوج نے دراندازی کی اطلاع ملنے پر دراندازوں کے خلاف کارروائی شروع کی تو مسلح افراد کے ساتھ فائرنگ کے تبادلے میں اس کا تیسرا فوجی بھی ہلاک ہو گیا جب کہ ایک مسلح شخص بھی اس دوران مارا گیا۔ واضح رہے کہ مصر 1979 میں اسرائیل کے ساتھ امن معاہدے پر دستخط کرنے والا پہلا عرب ملک ہے۔
