اسرائیل اور حزب اللہ کے درمیان جنوبی لبنان میں جھڑپیں شدت اختیار کر گئی ہیں، جہاں اسرائیلی فوج کی پیش قدمی کے دوران 4 فوجیوں کی ہلاکت کی تصدیق کی گئی ہے، جبکہ خطے میں کشیدگی مزید بڑھنے کا خدشہ ظاہر کیا جا رہا ہے۔
اسرائیل نے کہا ہے کہ جنوبی لبنان میں جاری جھڑپوں کے دوران اس کے 4 فوجی ہلاک ہو گئے ہیں، جہاں اسرائیلی فوج حزب اللہ کے خلاف زمینی کارروائیوں کو مزید وسعت دے رہی ہے۔
اسرائیلی فوج کے مطابق ہلاک ہونے والے فوجیوں میں سے 3 کا تعلق ایک ہی بٹالین سے تھا جو لڑائی کے دوران مارے گئے، جبکہ ایک اور فوجی اسی واقعے میں ہلاک اور 2 زخمی ہوئے۔ زخمی اہلکاروں کو طبی امداد کے لیے منتقل کر دیا گیا ہے۔
رپورٹس کے مطابق 2 مارچ سے اب تک اسرائیل اور حزب اللہ کے درمیان جاری جھڑپوں میں کم از کم 10 اسرائیلی فوجی ہلاک ہو چکے ہیں۔ دوسری جانب لبنانی وزارت صحت کے مطابق اسرائیلی حملوں میں اب تک 1200 سے زائد افراد جان کی بازی ہار چکے ہیں جبکہ 10 لاکھ سے زائد افراد بے گھر ہو چکے ہیں۔
ادھر یونائیٹڈ نیشنز انٹرم فورس (یونیفل) نے بھی تصدیق کی ہے کہ جنوبی لبنان میں حالیہ واقعات کے دوران اس کے 3 امن اہلکار ہلاک ہوئے، جن میں 2 ایک نامعلوم دھماکے میں جبکہ ایک اتوار کے روز گولہ باری سے مارا گیا۔
اسرائیلی وزیراعظم بینجمن نیتن یاہو نے فوج کو جنوبی لبنان میں کارروائیوں کا دائرہ وسیع کرنے کی ہدایت دی ہے، جس کا مقصد مبینہ طور پر دریائے لیتانی تک ایک ’بفر زون‘ قائم کرنا ہے۔
اسرائیلی حکومت کے شدت پسند وزرا نے اس سے بھی آگے بڑھتے ہوئے جنوبی لبنان کو ضم کرنے کی تجویز دی ہے، جبکہ اسرائیلی فوج علاقے میں پلوں اور رہائشی عمارتوں کو نشانہ بنا کر اسے باقی ملک سے کاٹنے کی کوشش کر رہی ہے۔
دوسری جانب حزب اللہ کے رہنما نعیم قاسم نے واضح کیا ہے کہ طاقت کے عدم توازن کے باوجود وہ اسرائیلی پیش قدمی کو آسان نہیں ہونے دیں گے اور جنگ کو اسرائیل کے لیے مہنگا بنانے کی حکمت عملی پر عمل پیرا ہیں۔
لبنان میں یہ کشیدگی ایسے وقت میں بڑھ رہی ہے جب خطے میں ایران کے خلاف جاری امریکی و اسرائیلی کارروائیوں کے باعث صورتحال پہلے ہی انتہائی نازک ہو چکی ہے، جس سے پورے مشرقِ وسطیٰ میں عدم استحکام کے خدشات بڑھ گئے ہیں۔
