وزیراعلیٰ پنجاب مریم نواز نے عوام کو خوشخبری سناتے ہوئے کہا ہے کہ نواز شریف کینسر اسپتال صحت کے شعبے میں انقلاب برپا کرنے کے لیے تیار ہے۔
مریم نواز نے سماجی رابطے کی سائٹ ’ایکس‘ پر اسپتال کی ویڈیو شیئر کرتے ہوئے لکھا کہ ملک میں پہلی بار صحت کے شعبے میں ایسی سہولت فراہم کی گئی ہے، جہاں کینسر کے مریضوں کا مکمل علاج ہوگا۔
نواز شریف انسٹیٹیوٹ آف کینسر ٹریٹمنٹ اینڈ ریسرچ، لاہور!
صحت کے شعبے میں ایک تاریخی سنگِ میل عبور، ملک کا پہلا جدید سرکاری کینسر اسپتال قائم ! جہاں ایک ہی چھت تلے کینسر کا مکمل علاج ممکن ہوگا۔ جن میں جدید تشخیص، لیبارٹری سروسز، ریڈیالوجی، لیناک پر مبنی ریڈی ایشن تھراپی اور سرجری… pic.twitter.com/JeLn7si3Fn— WE News (@WENewsPk) April 1, 2026
انہوں نے کہاکہ اسپتال ایک ہی چھت تلے جامع علاج فراہم کرےگا، جہاں تمام سہولیات موجود ہوں گی۔
ماہرین کا کہنا ہے کہ یہ محض ایک اسپتال نہیں بلکہ عوامی خدمات کے شعبے میں ایک نئے دور کا آغاز ہے۔
کچھ روز وزیر صحت پنجاب خواجہ سلمان رفیق، چیئرمین بورڈ اور سابق چیف سیکریٹری پنجاب کیپٹن (ر) زاہد سعید، اور سیکریٹری صحت عظمت محمود نے زیر تعمیر نواز شریف انسٹی ٹیوٹ آف کینسر ٹریٹمنٹ اینڈ ریسرچ کا دورہ کیا اور جاری کام کی پیش رفت کا جائزہ لیا۔
خواجہ سلمان رفیق نے کہاکہ حکومت پنجاب لاہور میں قریباً 75 ارب روپے کی لاگت سے 915 بستروں پر مشتمل اسٹیٹ آف دی آرٹ نواز شریف انسٹی ٹیوٹ آف کینسر ٹریٹمنٹ اینڈ ریسرچ قائم کررہی ہے۔
مزید پڑھیں: ’نواز شریف کینسر اسپتال جنات بنا رہے ہیں‘، مریم نواز نے یہ بات کیوں کہی؟
انہوں نے بتایا کہ وزیر اعلیٰ پنجاب مریم نواز شریف انسٹی ٹیوٹ پر جاری پیش رفت کو مسلسل خود مانیٹر کر رہی ہیں اور اس پر دن رات کام جاری ہے۔ یہ پاکستان کا پہلا مکمل سرکاری کینسر اسپتال ہوگا جہاں کسی مریض کو علاج سے انکار نہیں کیا جائے گا اور لیول تھری اور لیول فور کے مریضوں کا بھی مفت علاج فراہم کیا جائے گا۔
