آئی جی اسلام آباد کے احکامات پر وفاقی دارالحکومت کے مختلف علاقوں میں جرائم پیشہ افراد اور غیر قانونی مقیم شہریوں کے خلاف بڑے پیمانے پر گرینڈ کومبنگ سرچ آپریشنز جاری ہیں۔
ترجمان اسلام آباد پولیس کے مطابق آپریشنز تھانہ ترنول، تھانہ بھارہ کہو، تھانہ کھنہ، تھانہ کراچی کمپنی، تھانہ سبزی منڈی اور تھانہ کورال میں انجام دیے گئے، جبکہ زونل ایس پیز کی نگرانی میں انہیں مکمل کیا گیا۔ لیڈیز پولیس نے بھی ان کارروائیوں میں حصہ لیا۔
سرچ آپریشنز کے دوران 767 افراد اور 333 گھروں کی جانچ کی گئی، 149 دوکانوں اور 32 ہوٹلز کا معائنہ کیا گیا جبکہ 241 موٹر سائیکلوں اور 80 گاڑیوں کی چیکنگ بھی کی گئی۔ اس دوران 64 مشکوک افراد کو حراست میں لیا گیا، جبکہ 36 موٹر سائیکلیں مزید جانچ کے لیے متعلقہ تھانوں منتقل کی گئیں۔
ترجمان نے بتایا کہ آئی جی اسلام آباد نے شہر میں جرائم کی بیخ کنی اور شہریوں کے تحفظ کے لیے ضلع بھر میں گرینڈ سرچ آپریشنز کے احکامات جاری کیے ہیں۔
پولیس نے شہریوں سے تعاون کی اپیل کرتے ہوئے کہا کہ مشکوک سرگرمی کی صورت میں فوری اطلاع دی جائے۔
اسلام آباد پولیس شہریوں کے جان و مال کے تحفظ کے لیے ہر ممکن اقدامات یقینی بنا رہی ہے۔
