ملک میں مغربی ہواؤں کا نیا سلسلہ داخل ہو گیا ہے، جس کے تحت آج سے مختلف علاقوں میں بارشوں کا نیا سپیل شروع ہونے کا امکان ہے۔ محکمہ موسمیات نے 5 اپریل تک بارشوں کی پیشگوئی کی ہے۔
مزید پڑھیں: بلوچستان میں طوفانی بارش اور ژالہ باری سے تباہی، متعدد ہلاکتیں
رپورٹ کے مطابق گلگت بلتستان اور کشمیر کی بالائی وادیوں میں مزید ٹھنڈک بڑھنے کا امکان ہے، جبکہ مری، گلیات اور اسلام آباد میں وقفے وقفے سے بارش متوقع ہے۔
پنجاب اور خیبرپختونخوا کے میدانی علاقوں میں تیز آندھی کے ساتھ ژالہ باری کا بھی امکان ظاہر کیا گیا ہے، جبکہ آسمانی بجلی اور تیز ہواؤں کے باعث کمزور ڈھانچوں کو نقصان پہنچنے کا خدشہ ہے۔
محکمہ موسمیات کے مطابق چترال، دیر، سوات، کالام، شانگلہ، بونیر، کوہستان اور مانسہرہ میں گرج چمک اور تیز ہواؤں کے ساتھ بارش کا امکان ہے۔
اسی طرح لاہور، راولپنڈی، فیصل آباد اور سیالکوٹ سمیت پنجاب کے مختلف شہروں میں بھی آندھی اور بارش کی توقع ہے۔
مزید پڑھیں:بلوچستان میں شدید بارشوں کے بعد سیلابی صورتحال، مسافر وین اور ٹرک ریلے میں بہہ گئے
دوسری جانب کراچی، حیدرآباد، سکھر اور لاڑکانہ میں وقفے وقفے سے بارش کا سلسلہ جاری ہے۔
محکمہ موسمیات نے خبردار کیا ہے کہ شدید بارشوں کے باعث شمال مشرقی بلوچستان اور جنوبی خیبرپختونخوا کے ندی نالوں میں طغیانی کا خطرہ ہے، لہٰذا شہری احتیاطی تدابیر اختیار کریں۔
