ترکیہ کی آئینی عدالت کے صدر قادر اوزکیا آئندہ ہفتے پاکستان کا اہم دورہ کریں گے، جس کے دوران دونوں ممالک کی اعلیٰ عدلیہ کے درمیان تعاون کو فروغ دینے کے لیے معاہدہ کیا جائے گا۔ اس دورے میں اعلیٰ سطح کی ملاقاتیں اور تقریبات بھی شامل ہوں گی۔
ترکیہ کی آئینی عدالت کے صدر اپنے دورے کے دوران سپریم کورٹ آف پاکستان کا دورہ کریں گے، جہاں باہمی عدالتی تعاون کے معاہدے پر دستخط کیے جائیں گے۔ اس موقع پر چیف جسٹس پاکستان یحییٰ آفریدی 6 اپریل کو معزز مہمان کے اعزاز میں ظہرانہ دیں گے۔
یہ بھی پڑھیں:وفاقی آئینی عدالت: صدر، وزیراعظم اور آرمی چیف کیخلاف آرٹیکل 6 کی کارروائی کے لیے درخواست دائر
اس کے علاوہ چیف جسٹس آئینی عدالت امین الدین خان بھی 7 اپریل کو ترک ہم منصب کے اعزاز میں ظہرانہ دیں گے۔ دورے کے دوران ترک وفد وفاقی آئینی عدالت کا دورہ بھی کرے گا، جہاں دونوں ممالک کے عدالتی نظام اور تجربات کے تبادلے پر بات چیت متوقع ہے۔
یہ دورہ پاکستان اور ترکیہ کے درمیان عدالتی تعلقات کو مزید مضبوط بنانے اور قانونی شعبے میں تعاون بڑھانے کے لیے اہم پیش رفت قرار دیا جا رہا ہے۔
