وزیراعلیٰ پنجاب مریم نواز نے ایسٹر کے موقع پر پاکستان میں بسنے والی مسیحی برادری کو مبارکباد دی اور ان کے لیے دعائیں کیں۔ انہوں نے کہا کہ مسیحی برادری نے ملک کی ترقی میں بھرپور کردار ادا کیا ہے اور پنجاب میں اقلیتوں کے لیے سہ ماہی مالی معاونت اور ڈویلپمنٹ فنڈز بھی فراہم کیے جا رہے ہیں۔
یہ بھی پڑھیں:ایسٹر کے موقع پر روس یوکرین میں جنگی کارروائیاں نہیں کرے گا، روسی صدر کا اعلان
وزیراعلیٰ پنجاب مریم نواز نے کہا ہے کہ مسیحی برادری کی خوشیوں میں وہ برابر کے شریک ہیں اور پاکستان میں بسنے والی یہ برادری امن پسند اور قابل احترام ہے۔ انہوں نے کہا کہ مسیحی برادری نے نہ صرف تحریک پاکستان میں حصہ لیا بلکہ ملک کی تعمیر و ترقی میں بھی اپنا نمایاں کردار ادا کیا ہے۔
مریم نواز نے مزید کہا کہ وطن عزیز کی ترقی میں مسیحی برادری کی خدمات اور وطن سے ان کی محبت و وابستگی کسی شک و شبہ سے بالا تر ہے۔ انہوں نے قائد اعظم محمد علی جناحؒ کے اقلیتوں کے لیے مساوات کے اصولوں کا حوالہ دیتے ہوئے کہا کہ ایسٹر کے موقع پر محبت، بھائی چارے اور اتحاد کا پیغام عام کرنا ہر فرد کی ذمہ داری ہے۔
وزیراعلیٰ نے بتایا کہ پنجاب میں اقلیتی برادریوں کے لیے گرانٹس میں اضافہ کیا گیا ہے اور ڈویلپمنٹ فنڈ بھی مختص کیے گئے ہیں۔ اسی کے ساتھ پہلی بار مینارٹی کارڈ متعارف کرایا گیا ہے تاکہ ایک لاکھ سے زائد مستحق اقلیتی خاندانوں کو سہ ماہی مالی معاونت کے تحت 10,500 روپے فراہم کیے جا سکیں۔
مریم نواز نے اس موقع پر مسیحی برادری کو یقین دلایا کہ حکومت ان کے حقوق اور خوشحالی کے لیے ہر ممکن اقدامات کرے گی اور ایسٹر کے پیغام کو فروغ دینے میں اپنا کردار جاری رکھے گی۔
