وزیر اعلیٰ پنجاب مریم نواز کے حکم پر صوبائی وزیر ٹرانسپورٹ بلال اکبر نے میٹرو بس سسٹم کے مختلف اسٹیشنز کا دورہ کیا اور مسافروں کو مفت سفری سہولت فراہم کرنے کے منصوبے کا جائزہ لیا۔ یہ اقدام غریب و متوسط طبقے کو مہنگے پٹرول سے فوری ریلیف دینے کے مقصد سے کیا گیا ہے۔
یہ بھی پڑھیں:اسلام آباد اور پنجاب میں پبلک ٹرانسپورٹ مفت کر دی گئی، کسانوں اور شہریوں کے لیے بھی سبسڈی کا اعلان
صوبائی وزیر ٹرانسپورٹ بلال اکبر نے میٹرو بس، سپیڈو، اور اوورنج لائن میٹرو ٹرین اسٹیشنز کا دورہ کرتے ہوئے مسافروں کو فراہم کردہ سہولتوں کا جائزہ لیا اور مفت سفری سہولت کے بارے میں ان سے بات کی۔ مسافروں نے وزیر اعلیٰ مریم نواز شریف کی جانب سے یہ اقدام سراہا اور اپنی خوشی اور اطمینان کا اظہار کیا۔
بلال اکبر نے کہا کہ عوام اپنی ذاتی سواری چھوڑ کر مفت سفری سہولت کو ترجیح دے رہے ہیں، اور یہ منصوبہ خاص طور پر گرین الیکٹرک بسوں کے ذریعے لاکھوں لوگوں کے لیے آرام دہ سفر ممکن بنا رہا ہے۔
وزیر اعلیٰ مریم نواز کے اعلان نے عوام کے دل جیت لیے ہیں اور مسافروں نے مزید بسوں کی فراہمی کی بھی درخواست کی۔ بلال اکبر نے متعلقہ ٹرانسپورٹ افسران کو ہدایت کی کہ مسافروں کو درپیش مسائل کو فوری طور پر حل کیا جائے تاکہ مفت سفری سہولت کے فوائد ہر شہری تک پہنچ سکیں۔
