غزہ سے متعلق پوسٹ لائک کرنے پر کام سے برطرف کیا گیا، ہالی ووڈ اداکارہ کیٹ بیکنسیل کا دعویٰ

ہالی ووڈ کی معروف اداکارہ کیٹ بیکنسیل نے دعویٰ کیا ہے کہ غزہ میں جنگ بندی کی حمایت کرنے والی ایک سوشل میڈیا پوسٹ کو لائک کرنے کے بعد انہیں اپنے ایجنٹ کی جانب سے برطرف کر دیا گیا۔

بین الاقوامی میڈیا کے مطابق اداکارہ نے یہ انکشاف انسٹاگرام پر کیے گئے تبصروں میں کیا، جو بعد میں حذف کر دیے گئے۔ یہ تبصرے ایک ویڈیو کے نیچے کیے گئے تھے جس میں اداکار مارک رفالو اپنی نئی فلم ’’Palestine 36‘‘ کے بارے میں بات کر رہے تھے۔

یہ بھی پڑھیے: بالی وڈ اداکار غزہ میں مظالم پر خاموش، ہمارے فنکار ان کی تعریفیں کرنا چھوڑ دیں، صحیفہ جبار

52 سالہ اداکارہ نے لکھا کہ ‘یہ بہت آسان ہوگا اگر کسی کو جنگ بندی کی حمایت کرنے اور بچوں کے قتل کے خلاف آواز اٹھانے پر اپنے ایجنٹ سے نہ نکالا جائے۔’ انہوں نے کہا کہ ان کے سوشل میڈیا مؤقف کے باعث انہیں پیشہ ورانہ نقصان اٹھانا پڑا۔

کیٹ بیکنسیل نے اپنے بیان میں سوسن سیرینڈن کا حوالہ بھی دیا، جنہیں 2023 میں فلسطین کے حق میں ریلی میں شرکت کے بعد ایک بڑی ٹیلنٹ ایجنسی نے چھوڑ دیا تھا۔ اداکارہ کے مطابق انہیں بھی اسی ایجنٹ نے اسی روز برطرف کیا جس دن سیرینڈن کو نکالا گیا۔

انہوں نے 2023 کی اداکاروں کی طویل ہڑتال کا ذکر کرتے ہوئے کہا کہ نو ماہ تک کام بند رہنے کے بعد جب حالات بہتر ہو رہے تھے، اسی دوران یہ واقعہ پیش آیا۔ اداکارہ نے مزید بتایا کہ اس وقت وہ شدید ذاتی مشکلات سے بھی گزر رہی تھیں، جن میں والدہ کی بیماری اور سوتیلے والد کی سنگین طبی حالت شامل تھی۔

یہ بھی پڑھیے: ملالہ یوسف زئی غزہ کی صورت حال پر خاموش کیوں ہیں؟ شہزاد رائے کے سوال پر وضاحت کردی

کیٹ بیکنسیل نے دعویٰ کیا کہ انہوں نے اس معاملے پر مارک رفالو سے رابطہ کیا، تاہم انہیں کوئی جواب موصول نہیں ہوا۔ اس حوالے سے تاحال کوئی باضابطہ ردعمل سامنے نہیں آیا۔