لاہور کی اینٹی کرپشن عدالت نے سابق وزیراعلیٰ پنجاب چوہدری پرویز الٰہی کے خلاف غیر قانونی بھرتیوں کے کیس میں جسمانی ریمانڈ کی استدعا مسترد کر دی ہے اور انہیں 14 روزہ جوڈیشل ریمانڈ پر جیل بھیج دیا گیا ہے۔ عدالت نے اس حوالے سے محفوظ فیصلہ سنا دیا۔
اتوار کے دن اینٹی کرپشن کی جانب سے پرویز الٰہی کو عدالت میں پیش کیا گیا مگر جب سماعت شروع ہوئی تو اینٹی کرپشن حکام نے جوڈیشل مجسٹریٹ غلام مرتضیٰ ورک پر عدم اعتماد کر دیا۔
اینٹی کرپشن نے موقف اختیار کیا کہ جوڈیشل مجسٹریٹ کے ٹوئٹر اور فیس بیک پیجز بنے ہوئے ہیں۔ سیشن جج اس کیس کی سماعت کے لیے کسی اور جج کا انتخاب کریں۔
میرا کوئی سوشل میڈیا اکاؤنٹ نہیں: جوڈیشل مجسٹریٹ
اس موقع پر فاضل جج نے تردید کرتے ہوئے کہا کہ میرا کوئی سوشل میڈیا اکاؤنٹ نہیں ہے۔ اگر کسی کو کوئی اعتراض ہے تو سیشن جج کو درخواست دے دے۔
دوران سماعت پرویز الٰہی کے وکیل رانا انتظار ایڈووکیٹ نے اعتراض کیا کہ ہمیں مقدمے کی کاپی فراہم نہیں کی گئی اور دوسری جانب آپ پر بھی اعتراض اٹھا دیا گیا ہے جس کے بعد سماعت میں کچھ وقت کا وقفہ کیا گیا۔
وقفے کے بعد دوبارہ سماعت کا آغاز ہوا تو مجسٹریٹ غلام مرتضیٰ ورک نے کہا کہ کسی کی حمایت میں بات کروں تو ٹھیک ورنہ غلط، میرا منصب مجھے بولنے کی اجازت نہیں دیتا۔
اس موقع پر تفتیشی افسر نے پرویز الٰہی کے خلاف ثبوتوں کی بات کرتے ہوئے کہا کہ ہمیں سابق وزیراعلیٰ کا جسمانی ریمانڈ چاہیے جبکہ پرویز الٰہی کے وکیل نے جسمانی ریمانڈ کی مخالفت کی۔
پرویز الٰہی جعلی بھرتیوں کے کیس میں گرفتار، اینٹی کرپشن نے سیکریٹری پنجاب اسمبلی کو بھی پکڑ لیا
واضح رہے کہ چوہدری پرویز الٰہی کی گرفتاری یکم جون کو عمل میں لائی گئی تھی اور انہیں چوہدری ظہور الٰہی روڈ پر واقع ان کی رہائشگاہ کا چاروں اطراف سے گھیراؤ کر کے گرفتار کیا گیا۔
جمعہ 2 جون کے روز چوہدری پرویز الٰہی کو انسداد دہشتگردی عدالت سے رہائی ملنے کے بعد اینٹی کرپشن کے ہیڈ کوارٹر سے دوبارہ گرفتار کر لیا گیا تھا اور اس بار ان کی گرفتاری گوجرانوالہ میں درج مقدمے میں کی گئی جس کے بعد پولیس نے انہیں گوجرانوالہ منتقل کیا۔
گوجرانوالہ کی عدالت نے بھی چوہدری پرویز الٰہی کو بری کرنے کا حکم دیا تو اینٹی کرپشن حکام نے ان کو پنجاب اسمبلی میں ہونے والی جعلی بھرتیوں کے کیس میں گرفتار کیا۔
چاہے 100 کیس بھی بنا دیں پی ٹی آئی کے ساتھ کھڑا رہوں گا: پرویز الٰہی
دریں اثنا میڈیا سے گفتگو میں پرویز الٰہی نے کہا کہ چاہے 100 کیس بھی بنا لیں میں تحریک انصاف کے ساتھ کھڑا رہوں گا۔
پی ٹی آئی والے ڈٹ کر کھڑے رہیں، ہتھکنڈوں کا مقابلہ کریں، پرویز الہیٰ
pic.twitter.com/iKKw0QwYT4— PTI (@PTIofficial) June 4, 2023
پرویز الٰہی کا کہنا تھا کہ پی ڈی ایم ناکام ہو چکی ہے۔ ملک میں اس وقت مہنگائی عروج پر پہنچ چکی، کوئی کسی غلط فہمی میں نہ رہے پنجاب تحریک انصاف کے پاس ہی رہے گا۔
انہوں نے تحریک انصاف کے کارکنوں کو بھی پیغام دیا کہ آپ ڈٹ کر کھڑے رہیں اور حکمرانوں کے ہتھکنڈوں کا مقابلہ کریں۔
