سعودی وزارتِ خارجہ نے نہایت سخت الفاظ میں مسجدِ اقصیٰ کے احاطے میں اسرائیلی قابض افواج کی سرپرستی میں اسرائیلی وزیر کی جانب سے کیے گئے اشتعال انگیز اقدام کی شدید مذمت کی ہے۔
وزارت خارجہ نے اپنے بیان میں واضح کیا کہ ایسے اقدامات بین الاقوامی قوانین کی کھلی خلاف ورزی ہیں اور اسلامی مقدسات کی حرمت کو پامال کرنے کے مترادف ہیں، جو دنیا بھر کے مسلمانوں کے جذبات کو شدید مجروح کرتے ہیں۔
بیان میں مزید کہا گیا کہ سعودی عرب ان مسلسل اسرائیلی خلاف ورزیوں کو یکسر مسترد کرتے ہوئے عالمی برادری پر زور دیتا ہے کہ وہ اپنی ذمہ داریاں ادا کرتے ہوئے فلسطینی عوام اور مقبوضہ فلسطین میں موجود مقدس وتاریخی مقامات کے تحفظ کے لیے فوری اور مؤثر اقدامات کرے۔
سعودی عرب نے اس بات پر بھی زور دیا کہ مسجدِ اقصیٰ کی تاریخی و قانونی حیثیت کا احترام کیا جائے اور قابض قوت کو ان بار بار کی جانے والی سنگین خلاف ورزیوں پر جوابدہ ٹھہرایا جائے۔
