بنگلہ دیش کے وزیرِ خارجہ ڈاکٹر خلیل الرحمان منگل کو 3 روزہ سرکاری دورے پر نئی دہلی پہنچ گئے، جہاں وہ دوطرفہ تعاون کو مضبوط بنانے کے لیےمختلف سطح پر ملاقاتیں کریں گے۔
بھارتی وزارت خارجہ کے مطابق، خلیل الرحمان نے 7 اپریل کو بھارتی دارالحکومت میں اتر کر اعلیٰ سطح کے اجلاسوں کا آغاز کیا۔ دورے کے دوران وہ بھارت کے اہم وزرا کے ساتھ ملاقاتیں کریں گے۔
یہ بھی پڑھیں: بنگلہ دیش بھارت سرحد پر ہلاکتوں کے خلاف ڈھاکا میں احتجاج کا اعلان
8 اپریل کو بنگلہ دیش کے وزیرِ خارجہ بھارتی ہم منصب ایس جے شنکر سے حیدرآباد ہاؤس میں ملاقات کریں گے، جہاں علاقائی تعاون اور سفارتی تعلقات پر بات چیت متوقع ہے۔
اس کے علاوہ، وہ بھارتی وزیرِ تجارت و صنعت پیوش گوئل اور وزیر پیٹرولیم و قدرتی گیس ہردیپ سنگھ پوری سے علیحدہ ملاقاتیں کریں گے۔
ان ملاقاتوں میں ڈھاکہ اور نئی دہلی کے درمیان تجارتی وسعت، توانائی کے شعبے میں تعاون، اور اقتصادی شراکت داری پر غور کیا جائے گا۔
مزید پڑھیں: انقلاب منچا قتل کیس، بنگلہ دیش نے ملزمان کی حوالگی کے لیے بھارت سے باضابطہ درخواست کردی
عہدیداروں کا کہنا ہے کہ یہ دورہ دونوں ممالک کی اس کوشش کی عکاسی کرتا ہے کہ وہ بدلتے ہوئے علاقائی حالات میں اپنے اسٹریٹجک اور اقتصادی تعلقات کو مزید مضبوط کریں۔
بنگلہ دیش کے وزیرِ خارجہ 9 اپریل کو موریشس روانہ ہوں گے، جس کے ساتھ ان کا بھارت کا سرکاری دورہ اختتام پذیر ہوگا۔
