پاکستان پیپلز پارٹی کے چیئرمین اور سابق وزیر خارجہ بلاول بھٹو زرداری نے اسلام آباد میں جاری امریکا اور ایران کے درمیان مذاکرات کو خطے میں کشیدگی کم کرنے کی کوششوں میں اب تک کی سب سے بڑی کامیابی قرار دیا ہے۔
یہ بھی پڑھیں: امریکا ایران مذاکرات میں پلان بی کا کوئی آپشن موجود نہیں، بلاول بھٹو زرداری
الجزیرہ کو دیے گئے ایک انٹرویو میں بلاول بھٹو نے یہ بات اس سوال پر کی کہ آیا پاکستان ان مذاکرات سے کوئی واضح اور ٹھوس نتیجہ حاصل کر سکے گا۔
جنگ بندی کو اہم پیشرفت قرار
بلاول بھٹو نے کہا کہ سب سے اہم بات یہ ہے کہ فریقین کے درمیان جنگ بندی برقرار ہے، ایران اور خطے کے بیشتر حصوں میں بمباری رک گئی ہے اور دونوں بڑی طاقتیں اب مذاکرات کی میز پر موجود ہیں۔
I think that the fact that these talks are taking place is the biggest achievement so far. It’s significant that the ceasefire is in effect. The bombing has stopped in Iran and most of the Middle East, and the two major partners are now negotiating – Chairman PPP @BBhuttoZardari… pic.twitter.com/fMv0nUSt6u
— PPP (@MediaCellPPP) April 11, 2026
انہوں نے کہا کہ امید ہے یہ عارضی جنگ بندی آگے چل کر ایک مستقل امن معاہدے میں تبدیل ہو جائے گی۔
عالمی توجہ اور امید
بلاول بھٹو کے مطابق پاکستان سمیت پوری دنیا ان مذاکرات کو احتیاط کے ساتھ امید کی نظر سے دیکھ رہی ہے۔
انہوں نے کہا کہ گزشتہ 6 ہفتوں میں جنگ نے نہ صرف انسانی جانوں بلکہ عالمی معیشت کو بھی شدید نقصان پہنچایا ہے جس کے اثرات پوری دنیا میں محسوس کیے جا رہے ہیں۔
پاکستان اور دیگر ممالک کا کردار
بلاول بھٹو نے کہا کہ اس سفارتی عمل میں پاکستان کے علاوہ کئی دیگر ممالک نے بھی کردار ادا کیا ہے جن میں چین، سعودی عرب، ترکیہ، مصر،قطر اور دیگر خلیجی ممالک شامل ہیں۔
جنگ کوئی حل نہیں
انہوں نے زور دیتے ہوئے کہا کہ گزشتہ چند ہفتوں کے تجربے سے واضح ہو گیا ہے کہ جنگ کسی مسئلے کا حل نہیں۔
بلاول بھٹو نے کہا کہ اگر اس تنازعے کا کوئی مستقل اور متوازن حل نہ نکالا گیا تو اس کے اثرات مزید سنگین ہوں گے۔
مستقبل کا مؤقف
پاکستان کے ممکنہ کردار سے متعلق سوال پر انہوں نے کہا کہ اس وقت تمام توجہ موجودہ بحران کے حل پر ہے اور پائیدار امن ہی آگے بڑھنے کا واحد راستہ ہے۔
