امید ہے اسی مہینے آئی ایم ایف سے معاملات طے ہو جائیں گے، شہباز شریف

وزیر اعظم شہباز شریف کا کہنا ہے کہ آٗئی ایم ایف کی تمام شرائط پوری کر چکے ہیں پر امید ہوں کہ اسی مہینے آئی ایم کے ساتھ معاملات خوش اسلوبی سے طے پا جائیں گے۔

وزیر اعظم شہباز شریف نے ترک میڈیا کو انٹرویو دیتے ہوئے کہا کہ صدر طیب اردوان کو تیسری بارمنتخب ہونے پرمبارکباد پیش کرتا ہوں، طیب اردوان کے صدر منتخب ہونے پر پاکستان کے عوام بھی خوش ہیں۔

شہباز شریف نے کہا کہ پاکستان میں گزشتہ سیلاب سے 3 کروڑ لوگ متاثر ہوئے، بڑے پیمانے پر فصلوں کو نقصان پہنچا اس دوران ترکیہ کی عوام نے دل کھول کر پاکستانیوں کی مدد کی جس کا میں بے حد شکرگزار ہوں۔

وزیر اعظم کا کہنا تھا کہ ترکیہ کے ساتھ باہمی تعاون کو مزید بڑھانا چاہتے ہیں، مختلف شعبوں میں دونوں ممالک کے درمیان تعاون اور تجارتی حجم کو بڑھائیں گے۔

’پاکستان اور ترکیہ کے قربت پر مبنی تعلقات اعتماد کے رشتوں پر استوار ہیں۔‘

انٹرویو کے دوران معیشت سے متعلق سوال کے جواب میں وزیر اعظم نے کہا کہ گزشتہ حکومت نے آئی ایم ایف کیساتھ کیے گئے معاہدے کی خلاف ورزی کی جس کی وجہ سے معاشی مشکلات کا سامنا کرنا پڑا، آئی ایم ایف کے نویں جائزہ کے لیے تمام شرائط پوری کر چکے ہیں پر امید ہوں کہ  اسی مہینے اچھی خبریں ملیں گی۔

انہوں نے کہا کہ 9 مئی کو کسی دوسرے الزام میں نہیں بلکہ بدعنوانی کے الزام میں سابق وزیر اعظم کی گرفتاری ہوئی، جب وہ گرفتار ہوئے تو ریاست کے خلاف پلان کے تحت فوجی تنصیبات اور سرکارمی املاک پر حملہ آور ہو گئے۔

انکا مزید کہنا تھا کہ جو لوگ بھی ان اقدامات میں ملوث تھے قانون ان افراد کے خلاف اپنا راستہ بنارہا ہے، جس پر جتنا سنگین الزام ثابت ہو گا اس کو اس الزام کے تحت سزا ہوگی۔