پاکستان کرکٹ بورڈ نے رمیز راجا کی جانب سے دیے گئے بیان کی تردید کر دی، ترجمان کرکٹ بورڈ کے مطابق رمیز راجا کو کمنٹری پینل میں شامل ہونے کے لیے معافی مانگنے کا نہیں کہا گیا ۔
کھیلوں کی خبروں کی ویب سائیٹ کرکٹ پاکستان کے مطابق ترجمان پی سی بی کا کہنا تھا پاکستان سپر لیگ کے آٹھویں سیزن کے لیے کمنٹری پینل کا اعلان آئندہ ہفتے کیا جائے گا ۔
یاد رہے رمیز راجا نے گزشتہ روز بیان دیا تھا کہ پی ایس ایل کے آٹھویں سیزن کے کمنٹری پینل میں شمولیت کے لیے کرکٹ بورڈ نے انہیں معافی مانگنے کا کہا ہے۔
معافی مانگنے کے بعد انہیں کمنٹری پینل میں شمولیت کی درخواست دینے کے لیے کہا گیا جس پر بورڈ کی کمیٹی غور کرے گی کہ آیا انہیں کمنٹری پینل میں شامل کیا جائے یا نہیں۔
یاد رہے رمیز راجا نے ایک انٹرویو میں پی سی بی کی نئی مینجمنٹ پر تنقید کی تھی کہ سیاست کو کھیل سے دور رہنا چاہیے۔
پاکستان سپر لیگ سیزن آٹھ کے مقابلے 13 فروری سے شروع ہوں گے جبکہ آٹھویں سیزن کا فائنل 19 مارچ کو کھیلا جائے گا۔
