ایشیائی ترقیاتی بینک نے سمندروں کے تحفظ کے لیے ایشیا اور بحر الکاہل کے ممالک کے لیے 5 ارب ڈالر کے منصوبے کا اعلان کیا ہے۔ اس منصوبے کے تحت سمندروں کو آلودگی سے پاک کرنے کے علاوہ پائیدار معاشی ترقی کو یقینی بنانے کے لیے اقدامات کیے جائیں گے۔
ایشیائی ترقیاتی بینک کی جانب سے’ہیلدی اوشن ایکشن پلان‘ کے نام سے جاری ایک رپورٹ میں تفصیلات سامنے آئی ہیں، جس میں کہا گیا ہے کہ ایشیائی ترقیاتی بینک نے سمندروں کے تحفظ کے لیے ایشیا اور بحرالکاہل کے ممالک کے لیے 5 ارب ڈالر کے منصوبے اعلان کیا ہے۔
ایشیائی ترقیاتی بینک کی رپورٹ میں کہا گیا ہے کہ ماحولیاتی آلودگی سے پاک سمندر ایشیا اور بحر الکاہل کے خطوں کی معیشتوں کے لیے انتہائی اہمیت کا حامل ہوگا۔
رپورٹ میں مزید بتایا گیا ہے کہ آلودگی سے پاک سمندر ایشیا اور بحر الکاہل کے ممالک میں غذائی تحفظ، زراعت کے فروغ اور ثقافتی ورثے کے تحفظ کے لیے اہمیت کے حامل ہیں۔
رپورٹ کے مطابق ایشیائی ترقیاتی بینک نے 2019 سے لے کر 2024 تک کی مدت میں سمندروں کو آلودگی سے پاک کرنے کے لیے تقریباً 5 ارب ڈالر کی معاونت کا منصوبہ بنایا ہے۔
رپورٹ میں یہ بھی بتایا گیا ہے کہ منصوبےکے تحت ساحلوں اور میرین ایکو سسٹم کے تحفظ، ساحلی علاقوں میں رہنے والے لوگوں کے لیے روزگار اور پائیدار معاشی ترقی کو یقینی بنانے کے لیے اقدامات کیے جائیں گے۔
