حلیم عادل شیخ نے مبینہ ویڈیو پر خاموشی توڑ دی، پی ٹی آئی کے دو یوسی چیئرمینز کا بھی وضاحتی بیان

پاکستان تحریک انصاف سندھ کے صدر حلیم عادل شیخ نے کہا ہے کہ میری 2 سے اڑھائی مہینے پرانی ویڈیو سوشل میڈیا پر پھیلا کر پروپیگنڈا کیا جا رہا ہے۔

اپنے ایک ویڈیو پیغام میں انہوں نے کہا کہ ہم میئر کراچی کے امیدوار کے لیے حافظ نعیم الرحمان کی حمایت کا اعلان کر چکے ہیں اور ہمارا جو ممبر ان کو ووٹ نہیں دے گا اس کے خلاف قانونی کارروائی کرتے ہوئے اسے ڈی سیٹ کروائیں گے۔

اُلٹی گنگا بہ رہی ہے ۔ سوج آج نا جانے کہاں سے نکلا ہے کہ میری دوڈھائ مہینہ پرانی وڈیو پیپلزپارٹی کے سوشل سے وائرل کی جارہی ہے ۔

پاکستان تحریک انصاف @PTIofficial کے چئیرمین عمران خان صاحب کی ہدایت پر پی ٹی آئ نے کراچی کے مئیر اور ڈپٹی مئیر کے الیکشن میں جماعت اسلامی کے امیدوار… pic.twitter.com/qqjWRYjBNF

— Haleem Adil Sheikh (@HaleemAdil) June 12, 2023

انہوں نے کہا کہ ہمارے کراچی کے صدر جب حافظ نعیم الرحمان سے میٹنگ کرنے گئے تو ان کو گرفتار کر لیا گیا۔ ہم ایک کمٹمنٹ والے لوگ ہیں۔ اگر زور زبردستی کچھ کروایا جا سکتا ہے تو وہ تو پورے پاکستان میں ہو رہا ہے۔ ہم کیا کر سکتے ہیں۔

واضح رہے کہ حلیم عادل شیخ کی ایک ویڈیو پیپلزپارٹی کے حامی صارفین کی طرف سے سوشل میڈیا پر شیئر ہو رہی تھی جس میں وہ میئر کے الیکشن سے الگ ہونے کا کہہ رہے تھے۔

تحریک انصاف کے چیئرمینوں میں اختلافات کی خبریں من گھڑت ہیں، سعد خان

دوسری جانب تحریک انصاف کے ماڈل ٹاؤن یونین کونسل 6 سے چیئرمین سعد خان نے اپنے وضاحتی بیان میں کہا ہے کہ تحریک انصاف کے منتخب چیئرمینوں میں اختلافات کے حوالے سے پھیلائی جانے والی خبریں من گھڑت ہیں۔

انہوں نے کہا کہ ہم سب ایک پیج پر ہیں اور پارٹی پالیسی کے مطابق ووٹ دیں گے، ہمارے 4 چیئرمین جیلوں میں ہیں جبکہ 4 سے 5 لاپتہ ہیں۔ گروپ بندی کی خبروں میں کوئی صداقت نہیں۔

انہوں نے کہا کہ ہم 33 سے 34 چیئرمین 15 جون کو پارٹی پالیسی کے مطابق ووٹ کاسٹ کریں گے۔

اسی دوران شاہ فیصل ٹاؤن یوسی 8 کے منتخب چیئرمین ذیشان زیب کا ویڈیو بیان بھی سامنے آیا ہے جس میں وہ پارٹی پالیسی کے مطابق ووٹ دینے کی تصدیق کر رہے ہیں۔