سعودی عرب کی جنرل اتھارٹی آف سول ایوی ایشن ‘گاکا’ کا ایویشن سیکیورٹی وفد دوسرے مرحلے میں پاکستان پہنچ گیا ہے اور ‘گاکا’ سیکیورٹی اسسٹنٹ ٹیم نے لاہور سے دوسرے مرحلے کا آغاز کر دیا ہے۔
ترجمان سول ایوی ایشن کے مطابق ٹیم کو ایئرپورٹ اور حفاظتی اقدامات کے بارے میں بریفنگ دی گئی۔ ‘گاکا’ سیکیورٹی اسسٹنٹ ٹیم اے ایس ایف، ائرلائینز، گراونڈ ہینڈلنگ ایجنسیز کی جانب سے کئے گئے سیکیورٹی اقدامات کا جائزہ لے گی۔
8 رکنی سعودی ٹیم لیڈ انسپکٹر محمد العجمی کی قیادت میں لاہور پہنچی تھی جہاں ڈائریکٹوریٹ آف سیکیورٹی (ریگولیٹری) اور لاہور ایئر پورٹ انتظامیہ نے ٹیم کا استقبال کیا تھا۔
ڈی جی سول ایویشن نے کہا ہے کہ سعودی مہمانوں کو تمام ایئرپورٹس پر ہر ممکن تعاون فراہم کیا جائے۔ سعودی سیکیورٹی اسسمنٹ ٹیم کارگو ایجنٹس اور کیٹرنگ سمیت سیکیورٹی سروس فراہم کرنے والوں کے حفاظتی اقدامات کی افادیت کا جائزہ بھی لے گی۔
ٹیم اس دوسرے مرحلے میں سیالکوٹ اور ملتان ایئرپورٹس کا بھی معائنہ کرے گی۔ تیسرے مرحلے میں اسلام آباد اور پشاور کے ہوائی اڈوں پر سیکیورٹی انتظامات کا معائنہ بھی کیا جائے گا۔
