خیبر پختونخوا : آئندہ مالی سال صحت کارڈ بجٹ میں 8 ارب روپے کی کٹوتی کا فیصلہ

مالی مشکلات سے دوچار خیبر پختونخوا کی نگران حکومت نے آئندہ مالی سال کے بجٹ میں سرکاری ملازمین کی تنخواہوں میں 30 سے 35 فیصد اضافہ تجویز کرتے ہوئے صوبے بھر میں صحت کارڈ کے ذریعہ مفت علاج کی سہولت کے لیے بجٹ میں کمی کرنے کا فیصلہ کیا ہے۔

ہیلتھ کارڈ بجٹ میں کمی اور مفت علاج کی سہولت صرف غریب اور کم آمدن والے خاندانوں تک محدود کرنے کا فیصلہ نگران وزیر اعلی خیبر پختونخوا اعظم خان کی زیر صدرات ایک اجلا س میں کیا گیا۔ جس کی باقاعدہ منظوری آئندہ ہفتے پالیسی بورڈ کے اجلاس میں لی جائے گی۔

اجلاس میں شریک ایک افسر نے نام نہ بتانے کی شرط پر بتایا ہے کہ وزیر اعلٰی ہاؤس میں منعقدہ اس اجلاس میں پیش کردہ رپورٹ کا تمام پہلوؤں سے مکمل جائزہ لنے کے بعد ہیلتھ کارڈ بجٹ میں 8 ارب روپے کمی کا فیصلہ کیا گیا ہے۔

‘صوبہ شدید مالی بحران سے دوچار ہے اور ایسے حالات میں 28ارب روپے صحت کارڈ کے لیے مختص کرنا مشکل ہے۔ لہذا اجلاس میں فیصلہ ہوا ہے کہ 28 کے بجائے 20 ارب روپے مختص کیے جائیں گے۔ مفت علاج صرف غریب اور کم آمدنی والے خاندانوں کا حق ہے جب کہ امیر طبقہ خود بہترعلاج کراسکتا ہے۔

اجلاس میں دیگر فیصلوں کے حوالے سے مذکورہ افسر نے وی نیوز کو بتایا کہ نئی پالیسی وضع کررہے ہیں جس کے تحت امیر یا اعلی سرکاری حکام علاج کے لیے خود بھی ادائیگی کریں گے۔ صحت کارڈ پلس پروگرام کے ایک ذمہ دار نے بھی اس حوالے سے بجٹ میں کمی کی تصدیق کی ہے۔

’بجٹ میں کمی کے بعد نئی پالیسی پر کام جاری ہے۔ ہماری کوشش ہے کہ فنڈز میں کمی کے باوجود بھی علاج کی سہولت میں کمی نہ آئے اور علاج معالجہ کی بہتر سہولیات فراہم ہوسکیں۔‘

کچھ نجی اسپتالوں کو پینل سے نکالنے کی منظوری

صحت کارڈ کے ذمہ دار افسر کے مطابق نئی پالیسی میں صوبے کے کچھ نجی اسپتال صحت کارڈ پینل لسٹ سے نکل رہے ہیں۔ جس سے اخراجات میں کمی متوقع ہے۔ بعض ہسپتال ایسے بھی ہیں جو معیار پر پورا نہیں اترتے اورعلاج کے نام پر حکومت سے پیسے لے رہے ہیں۔ ان ہسپتالوں میں غیر ضروری علاج بھی ہوتے رہے ہیں۔

زیادہ علاج سرکاری ہسپتالوں میں ہی ہو گا

انھوں نے بتایا کہ صوبے کے سرکاری ہسپتالوں میں بہت بہتری ائی ہے۔ اور نئی پالیسی میں یہ شامل کیا جا رہا ہے کہ صحت کارڈ کے ذریعے بیشتر امراض کا مفت علاج سرکاری ہسپتالوں میں ہی ممکن ہو گا۔ اس سے بجٹ پر بوجھ کم ہو گا اور حکومت کو بھی فائدہ ہو گا۔

غیر ضروری آپریشن اور علاج کرنے والے ہسپتالوں کے خلاف کاروائی

صحت کارڈ کے ذمہ دار افسر نے بتایا کہ صحت کارڈ رپورٹ میں بات سامنے ائی کہ نجی ہسپتالوں میں غیر ضروری آپریشن اور علاج ہوئے ہیں، جس کی وجہ سے بجٹ پر بوجھ پڑا ہے۔ یہی وجہ ہے کہ بعض ہسپتالوں میں کیے گئے آپریشن اور مہنگےعلاج کی تحقیقات کی جارہی ہیں۔