وفاقی حکومت نے پیٹرولیم مصنوعات کے نرخوں میں اضافہ نہ کرنے کا اعلان کیا ہے۔ یہ فیصلہ ایک ایسے وقت میں سامنے آیا ہے جب میڈیا پر پیٹرولیم مصنوعات میں بیک وقت کمی اور اضافے کی خبریں گردش کر رہی تھیں۔
وزیر خزانہ اسحاق ڈار نے وزارت خزانہ میں پریس کانفرنس کرتے ہوئے پیٹرولیم مصنوعات کی قیمتوں سے متعلق اعلان کیا۔ اسحاق ڈار کا کہنا تھا وفاقی حکومت نے پیٹرول اور ڈیزل کی قیمتیں برقرار رکھنے کا فیصلہ کیا ہے جس کا اطلاق آج رات 12 بجے سے ہو گا۔
انہوں نے بتایا کہ عالمی منڈی میں گیس اور تیل کی قیمتوں میں تھوڑا سا اضافہ ہوا ہے اور آج کئی اخبارات نے رپورٹ کیا کہ ڈیزل کی قیمت میں ساڑھے 3 روپے کا اضافہ اور پیٹرول کی قیمت میں چند پیسوں کی کمی ہو گی، میں حیران ہوں کہ میڈیا کو پتا نہیں یہ خبریں کیسے ملیں۔
وزیر خزانہ اسحاق ڈار کا پٹرولیم مصنوعات کی موجودہ قیمتیں برقرار رکھنے کا اعلان۔
میڈیا میں ڈیزل کی قیمتیں بڑھانے کا دعوی کیا جارہا تھا جو درست نہیں، قیمتیں برقرار رکھی جارہی ہیں۔ pic.twitter.com/07FmDlPvgY— Raza Butt 🎙️ (@SocialDigitally) June 15, 2023
اسحاق ڈار کا کہنا تھا اوگرا نے جو تجاویز دیں اس کے مطابق ڈیزل اور پیٹرول کی قیمتیں برقرار رکھنے کا فیصلہ کیا گیا، جو آج کے اخبارات میں اضافہ رپورٹ ہوا تھا وہ اضافہ نہیں ہے۔
وفاقی حکومت کے اعلان کے بعد پیٹرول کی فی لیٹر قیمت 262 روپے اور ڈیزل کی قیمت 253 روپے فی لیٹر برقرار رہے گی جبکہ مٹی کے تیل کی قیمت 164روپے 7پیسے فی لیٹر اور لائٹ ڈیزل آئل کی قیمت بھی 147 روپے 68 پیسے فی لیٹر برقرار رہے گی۔
اس حوالے سے اسحاق ڈار نے خود کوئی ٹوئٹ کرنے کے بجائے ایک ری ٹوئٹ پر اکتفا کیا جس میں درج ہے کہ ’وزیر خزانہ اسحاق ڈار کا پیٹرولیم مصنوعات کی موجودہ قیمتیں برقرار رکھنے کا اعلان۔ میڈیا میں ڈیزل کی قیمتیں بڑھانے کا دعوی کیا جارہا تھا جو درست نہیں، قیمتیں برقرار رکھی جارہی ہیں‘۔
سوال یہ ہے کہ میڈیا میں پیٹرولیم مصنوعات کی قیمتوں کو لیکر کمی اور زیادتی کی بات کیوں کی جا رہی تھی۔
دراصل جس وقت وفاقی بجٹ پیش کیا گیا تب آئی ایم ایف کی جانب سے اس بجٹ پر تحفظات کا اظہار کیا گیا تھا۔ ایسے میں اندازہ یہی تھا کہ حکومت رفع شر کے لیے پیٹرولیم مصنوعات میں اضافہ کر دے گی۔ مگر اس دوران خام تیل سے بھرا روسی آئل ٹینکر پاکستان پہنچ گیا جس کے بعد قیاس ظاہر کیا گیا کہ حکومت پیٹرول کی قیمت میں کمی اور ڈیزل کی قیمت بڑھا دے گی۔
تاہم اسحاق ڈار کی جانب سے پیٹرولیم مصنوعات کی قیمتیں برقرار رکھنے کے اعلان کے بعد تمام قیاس آرائیاں دم توڑ گئی ہیں۔ قیمتوں میں کسی بھی قسم کی تبدیلی کیے جانے تک کا فیصلہ آئندہ 15 روز تک مؤثر ہوگا۔
