مغربی ممالک میں پارکور کا کھیل خاصی مقبولیت رکھتا ہے۔ اس کے کھلاڑیوں کی ویڈیوز دیکھ کر کوئٹہ کے نوجوانوں میں بھی پارکور کا شوق پیدا ہوا۔ اب یہ کھیل کوئٹہ کی ہزارہ برادری کے نوجوانوں میں بے حد مقبولیت اختیار کرچکا ہے۔
کوئٹہ میں پارکور کی مقبولیت کو دیکھتے ہوئے، اس کھیل کے فروغ کے لیے ہزارہ برادری سے تعلق رکھنے والے نوجوانوں نے پارکور کلب بھی قائم کرلیا جہاں نوجوانوں کو پارکور کی تربیت دی جاتی ہے۔
پارکور کا کھیل جمناسٹک کی ایک قسم ہے۔ اس کھیل میں کھلاڑی بھاگتے ہوئے اونچی عمارتوں سے کودتے اور قلابازی لگاتے ہیں، یوں اپنے فن کا مظاہرہ کرتے ہیں۔ پارکور میں فلپس، ہینڈ اسٹینڈ، رولنگ کرنے والے کھلاڑی کو ماہر سمجھا جاتا ہے۔
پارکور کے ایک کھلاڑی طالب حسین ساحل کے مطابق پارکور کا کھیل بہت دلچسپ ہے، جب میں نے انٹرنیٹ پر اس کی ویڈیوز دیکھیں تو مجھ میں اس کھیل کو سیکھنے کا شوق پیدا ہوا.
گزشتہ 7 برسوں سے پارکور کھیل رہا ہوں۔ اب میں نے اپنے چند دوستوں کے ساتھ مل کر ایک اکیڈمی بھی قائم کرلی ہے جہاں 100 سے زائد’ کھلاڑی تربیت حاصل کر رہے ہیں‘۔
ساحل کہتے ہیں’ابتدائی دنوں میں والدین جب مجھے پارکور کھیلتے دیکھتے تو بہت پریشان ہوتے تھے کہ کہیں چوٹ نہ لگ جائے تاہم جب میں نے عالمی سطح پر کچھ میڈل جیتے تو گھر والوں نے مجھے پارکور کے لیے مکمل اجازت دے دی۔
ساحل کہتے ہیں اگر حکومتی سطح پر سرپرستی مل جائے تو وہ پارکور کے ذریعے ملک کا نام دنیا بھر میں روشن کر سکتے ہیں۔
