صدر عارف علوی نے کہا ہے کہ پناہ گزینوں کا عالمی دن لاکھوں افغان مہاجرین کی میزبانی میں پاکستان کے گزشتہ 40 سالہ نمایاں کردار کی یاد دلاتا ہے، محدود وسائل کے باوجود کثیر تعداد میں بے گھر افراد کو پناہ دینا ہمارے بھائی چارے اور ہمدردی کا منہ بولتا ثبوت ہے، پاکستان دنیا میں پناہ گزینوں کی ایک بڑی آبادی کا میزبان ہے۔
ترجمان ایوان صدر کے مطابق صدر مملکت ڈاکٹر عارف علوی نے 20 جون کو پناہ گزینوں کے عالمی دن پر اپنے پیغام میں کہا ہے کہ پاکستان نے چیلنجز اور کم وسائل کے باوجود کھلے دل سے پناہ گزینوں کی مدد کی، افغان مہاجرین کی میزبانی کا بوجھ بانٹنے کے لیے ابتدائی طور پر پاکستان کو عالمی برادری کی جانب سے مالی مدد ملی۔
صدر کا کہنا تھا کہ وقت کے ساتھ امداد کم ہونے کے باوجود مہاجرین کی فلاح و بہبود اور رضاکارانہ واپسی کا پاکستان کا غیر متزلزل عزم ہے،40 سال گزرنے کے باوجود مہاجرین اور مقامی افراد کے مابین کوئی ناخوشگوار واقعہ نہیں ہوا، پاکستان نے اپنی جانب سے پناہ گزینوں کو ہر ممکن مدد فراہم کی۔
صدر علوی نے مزید کہا کہ پاکستان نے پناہ گزینوں کے لیے باوقار زندگی کی تعمیر نو کے لیے اقدامات کیے، پاکستان اقوام متحدہ کے ہائی کمشنر برائے مہاجرین سمیت فلاحی اداروں کے ساتھ کام کرتا رہا ہے، پاکستانی سرحدوں کے اندر مقیم پناہ گزینوں کو امداد اور تحفظ فراہم کرنے کے لیے کوشاں ہیں۔
صدر مملکت نے کہا کہ پاکستان نے افغان مہاجرین کو علم و ہنر سے آراستہ کرنے کے لیے جامع تعلیمی پروگرام متعارف کرائے، پاکستان نے یقینی بنایا کہ پناہ گزین بچوں کو معیاری تعلیم تک رسائی حاصل ہو۔ رحمدلی، ہمدردی اور شمولیت کی اقدار ہماری پہچان ہیں، انہیں تھامے رکھیں گے۔
