پاکستانی کرکٹ ٹیم کے دورۂ سری لنکا کے شیڈول کا اعلان کر دیا گیا ہے، 2 ٹیسٹ میچوں کی سیریز گال اور کولمبو میں کھیلی جائے گی۔ پہلا ٹیسٹ میچ گال انٹرنیشنل اسٹیڈیم میں 16 سے 20 جولائی تک کھیلا جائے گا۔ کولمبو کا سنہالیز اسپورٹس کلب 24 سے 28 جولائی تک دوسرے ٹیسٹ میچ کی میزبانی کرے گا۔
گال انٹرنیشنل اسٹیڈیم میں پاکستان ٹیم نے گزشتہ سال 342 رنز کا ہدف عبور کرکے 4 وکٹوں سے ٹیسٹ میچ جیتا تھا۔ یہ اس گراؤنڈ پر سب سے بڑا ہدف حاصل کرنے کا ریکارڈ ہے۔ پاکستان نے سنہالیز اسپورٹس کلب میں آخری مرتبہ 2014ء میں ٹیسٹ میچ کھیلا تھا، اس میدان میں پاکستان 6 ٹیسٹ میچ کھیل چکا ہے، ایک جیتا، ایک ہارا جبکہ 4 ٹیسٹ میچ برابری پر ختم ہوئے۔
پاکستان کرکٹ ٹیم 9 جولائی کو کولمبو پہنچے گی اور ٹیسٹ سیریز سے قبل 11 اور 12 جولائی کو 2 روزہ وارم اپ میچ بھی کھیلے گی۔ پاکستان ٹیم نے آخری مرتبہ گزشتہ سال جولائی میں سری لنکا کا دورہ کیا تھا جہاں کھیلی گئی ٹیسٹ سیریز ایک ایک سے برابر رہی تھی۔ دونوں ٹیسٹ میچز گال میں کھیلے گئے تھے۔ پاکستان نے پہلا ٹیسٹ چار وکٹوں سے جیتا تھا۔ سری لنکا نے دوسرے ٹیسٹ میں 246 رنز سے کامیابی حاصل کرکے سیریز برابر کر دی تھی۔
یہ پاکستانی ٹیم کی آئی سی سی ورلڈ ٹیسٹ چیمپئن شپ 25-2023 کی پہلی سیریز ہے۔ شیڈول اس طرح ہے:
9 جولائی: ٹیم کی کولمبو آمد۔
11 اور 12 جولائی: وارم اپ میچ۔
16 سے 20 جولائی: پہلا ٹیسٹ گال انٹرنیشنل اسٹیڈیم۔
24سے 28 جولائی: دوسرا ٹیسٹ ۔ سنہالیز اسپورٹس کلب کولمبو۔
پاکستانی ٹیم : بابراعظم (کپتان) محمد رضوان (وکٹ کیپر،نائب کپتان) عامر جمال۔ عبداللہ شفیق۔ ابرار احمد ۔حسن علی۔ امام الحق۔ محمد ہریرہ۔ محمد نواز۔ نسیم شاہ۔ نعمان علی۔ سلمان علی آغا۔ سرفراز احمد۔ سعود شکیل۔ شاہین آفریدی اور شان مسعود۔
پاکستان ٹیم کا سپورٹنگ اسٹاف: ریحان الحق (مینیجر) گرانٹ بریڈبرن (ہیڈ کوچ) اینڈریو پیوٹک (بیٹنگ کوچ) مورنے مورکل (باؤلنگ کوچ) آفتاب خان (فیلڈنگ کوچ) عبدالرحمن (اسسٹنٹ کوچ) ڈریکس سائمین (اسٹرینتھ اینڈ کنڈیشننگ کوچ) کلف ڈیکن (فزیوتھراپسٹ) احسن افتخار ناگی (میڈیا اینڈ ڈیجیٹل کانٹینٹ منیجر) لیفٹننٹ کرنل ریٹائرڈ عثمان انوری (سیکیورٹی مینیجر) طلحہ اعجاز (اینالسٹ) اور ملنگ علی (مساجر)۔
