بینظیر انکم سپورٹ پروگرام (BISP) نے بینظیر کفالت پروگرام کے تحت اب تک 1.448 ملین خاندانوں میں 13.039 ارب روپے تقسیم کردیے ہیں۔ اس کے علاوہ، 391,765 ماؤں نے بینظیر تعلیمی وظائف کے تحت انکے سکول جانے والے بچوں کے وظائف بھی وصول کئے ہیں۔
بینظیر انکم سپورٹ پروگرام نے پیر 19 جون 2023 کو بینظیر کفالت نقد امداد کی چوتھی سہ ماہی قسط جاری کی تھی۔ 25 فیصد اضافے کے بعد چوتھی سہ ماہی قسط کی رقم9000 روپے ہےجس کا اعلان وفاقی حکومت نے اس سال کے شروع میں کیا تھا۔
مزید پڑھیں
بینظیر کفالت کے علاوہ، بینظیر تعلیمی وظائف کی جنوری تا مارچ قسط بھی 6.7 ملین سکول جانے والے طلبا میں تقسیم کی جا رہی ہے جن کی سکول میں حاضری کم از کم 70 فیصد ہے۔ اس بار رقم کی ادائیگی پورے ملک میں قائم 1559 خصوصی طور پر منعقد کیمپ سائٹس کے ذریعے کی جارہی ہے۔
کیمپ سائٹس کے ذریعے وظیفے کی تقسیم کا مقصد مستحقین کو سہولت فراہم کرنا اور شفافیت کو یقینی بنانا ہے۔ اس دفعہ ایچ بی ایل اور بینک الفلاح کے اے ٹی ایم کے ذریعے ادائیگی کی فراہمی دستیاب نہیں ہوگی اور نہ ہی بی آئی ایس پی کے قائم کردہ کیمپ سائٹ کے باہر پی او ایس پر کوئی ادائیگی کی جائے گی۔
بینظیر کفالت کے 90 لاکھ مستحق خاندانوں میں تقریباً 81 ارب روپے تقسیم کیے جارہے ہیں جبکہ مزید 16 ارب روپے تعلیمی وظائف کے 6.7 ملین مستحقین میں تقسیم کیے جائیں گے۔
یہ نوٹ کرنا ضروری ہے کہ پرائمری سطح پرطالبات کو 2000 روپے جبکہ طلبہ کو 1500 روپے دیے جاتے ہیں۔ سیکنڈری سطح پر طلبات اور طلبہ کو بالترتیب 3000 اور 2500 روپے جبکہ ہائر سیکنڈری سطح پر 4000 اور 3500 روپے بالترتیب طلبات اور طلبہ کو ادا کئے جاتے ہیں۔
مستحقین ادائیگی کی رسید کے ساتھ 9 ہزار روپے وصول کریں، شازیہ مری
وفاقی وزیر برائے تخفیف غربت و سماجی تحفظ اور چیئرپرسن بی آئی ایس پی شازیہ مری نے اپنے پیغام میں رجسٹرڈ مستحقین سے مطالبہ کیا ہے کہ وہ ادائیگی کی رسید کے ساتھ 9000 روپے کی مکمل رقم وصول کریں۔ انہوں نے متعلقہ حکام کو سخت نگرانی اور چوکسی کے ذریعے شفافیت کو یقینی بنانے کی ہدایات جاری کیں ہیں۔
وفاقی وزیر نے مانیٹرنگ ٹیموں کو یہ احکامات بھی جاری کیے کہ مستحقین کی رقم سے کٹوتی کی کسی بھی شکایت کے خلاف سخت کارروائی کو یقینی بنایا جائے۔ شازیہ مری نے اس بات پر زور دیا کہ بینظیر کفالت کے مستحقین کو 9000 روپے کی پوری رقم وصول کریں۔اس کے علاوہ بینظیر تعلیمی وظائف کے مستحقین اپنے بچے یا بچی کا مقرر کردہ وظیفہ بھی حاصل کریں۔ وفاقی وزیر نے مستحقین پر زور دیا کہ وہ اپنی رقم گننے کے بعد رسید کا مطالبہ کریں ۔
وزیر حکومت نے اس بات کا اعادہ کیا کہ کسی بھی شکایت کی صورت میں مستحقین کو فوری طور پر بی آئی ایس پی کی ٹول فری ہیلپ لائن 26477-0800 پر اطلاع کرنی چاہیے اور نقد رقم کی شفاف تقسیم کو یقینی بنانے کے لیے کیمپ سائٹ پر تعینات بی آئی ایس پی افسر کو مطلع کرنا چاہیے۔
انہوں نے متنبہ کیا کہ بی آئی ایس پی کی جانب سے بھیجے گئے پیغامات صرف 8171 سے آئیں گے اور کسی دوسرے نمبر یا کوڈ سے آنے والے پیغامات پر بھروسہ نہیں کیا جانا چاہیے کیونکہ ایسے پیغامات جعلی اور فراڈ ہوتے ہیں۔
