کراچی میں قربانی کا جانور دیکھنے کا شوق بچے کی جان لے گیا، 12 سالہ بچہ بیل کی رسی میں پھنس کر جاں بحق ہوگیا۔
مقامی افراد اور جائے حادثہ سے ملنے والی سی سی ٹی وی فوٹیج کے مطابق نیو کراچی الیون جی گودھرا چوک میں یہ واقعہ اس وقت پیش آیا جب قربانی کے لیے لایا گیا بیل اچانک بھاگ کھڑا ہوا۔
عینی شاہدین کا کہنا ہے کہ بچہ یہاں قربانی کا بیل دیکھنے آیا تھا، جوں ہی بیل بھاگا تو اس کے گلے میں پڑی رسی 12 سالہ ابراہیم کے پاؤں سے الجھ گئی۔
بپھرا بیل بچہ کو اپنے ساتھ گھسیٹتا ہوا دور تک لے گیا۔ مقامی لوگوں نے بچے کو بچانے کی ہر ممکن کوشش کی لیکن اس وقت تک بہت دیر ہو چکی تھی۔ 12 سالہ ابراہیم شدید زخمی ہو چکا تھا، اسے اسپتال پہنچایا گیا لیکن وہ شدید چوٹیں لگنے کے باعث جانبر نہ ہوسکا۔
